របាយការណ៍សម្ងាត់មួយរបស់អង្គការឃ្លាំមើល បាននិយាយកាលពីថ្ងៃព្រហស្បតិ៍ (២៨ វិច្ឆិកា) ថា អ៊ីរ៉ង់បានជូនដំណឹងដល់អង្គការឃ្លាំមើលនុយក្លេអ៊ែរបស់អង្គការសហប្រជាជាតិថា ខ្លួនគ្រោងនឹងដំឡើងឧបករណ៍ចម្រាញ់សារធាតុអ៊ុយរ៉ានីញ៉ូមបន្ថែមជាង ៦.០០០គ្រឿង នៅឯរោងចក្ររបស់ខ្លួន ហើយនាំយកឧបករណ៍ចម្រាញ់ជាច្រើនទៀតដែលមានស្រាប់ ដាក់ឱ្យដំណើការ។

របាយការណ៍របស់ទីភ្នាក់ងារថាមពលអាតូមិកអន្តរជាតិ IAEA ដែលមើលឃើញដោយសារព័ត៌មានរ៉យទ័រ រៀបរាប់លម្អិតអំពីអ្វីដែលអ៊ីរ៉ង់ចង់បង្ហាញប្រាប់ពិភពលោក នៅពេលខ្លួននិយាយថា នឹងបន្ថែមឧបករណ៍ចម្រាញ់រាប់ពាន់គ្រឿងដើម្បីឆ្លើយតបទៅនឹងសេចក្ដីសម្រេចប្រឆាំងទីក្រុងតេអេរ៉ង់ ដែលក្រុមប្រឹក្សាភិបាល ៣៥ប្រទេសរបស់ IAEA បានអនុម័តកាលពីសប្តាហ៍មុន តាមសំណើរបស់ចក្រភពអង់គ្លេស បារាំង អាល្លឺម៉ង់ និងសហរដ្ឋអាមេរិក។

សមត្ថភាពចម្រាញ់កាន់តែច្រើនមានន័យថា អ៊ីរ៉ង់អាចចម្រាញ់សារធាតុអ៊ុយរ៉ានីញ៉ូមបានលឿនជាងមុន ដែលអាចបង្កើនហានិភ័យនៃការរីកសាយភាយនុយក្លេអ៊ែរ។ អ៊ីរ៉ង់ បដិសេធថាមិនចង់បង្កើតអាវុធនុយក្លេអ៊ែរទេ ប៉ុន្តែមហាអំណាចលោកខាងលិចនិយាយថា ពុំមានប្រទេសណាមួយដែលចម្រាញ់បានសារធាតុអ៊ុយរ៉ានីញ៉ូមរហូតដល់ ៦០% នៃភាពសុទ្ធ - ជិតប្រហែល ៩០% ជាកម្រិតអាវុធ - ដោយមិនប្រើដើម្បីផលិតគ្រាប់បែកនុយក្លេអ៊ែរនោះទេ។

អ៊ីរ៉ង់មានម៉ាស៊ីនចម្រាញ់អ៊ុយរ៉ានីញ៉ូមជាង ១០.០០០គ្រឿងរួចហើយ ដែលដំណើរការនៅរោងចក្រក្រោមដីចំនួនពីរនៅក្រុង ណាតាន់ (Natanz) និង ហ្វ័រដូ (Fordow )និងរោងចក្រសាកល្បងនៅលើដីមួយនៅក្រុង Natanz។ របាយការណ៍បានគូសបញ្ជាក់អំពីផែនការដំឡើងម៉ាស៊ីន ៣២ជួរបន្ថែមទៀត ឬចង្កោមនៃម៉ាស៊ីនជាង ១៦០គ្រឿង និងបណ្ដុំដ៏ធំនៃម៉ាស៊ីន IR-6 កម្រិតខ្ពស់រហូតដល់ ១.១៥២គ្រឿង៕