អង្គការសុខភាពពិភពលោក (WHO) កាលពីថ្ងៃព្រហស្បតិ៍ (ទី២៨ ខែវិច្ឆិកា) បានព្រមានអំពីការខ្វះខាតថ្នាំពេទ្យ អាហារ ទីជម្រក និងឥន្ធនៈយ៉ាងធ្ងន់ធ្ងរ នៅតំបន់ហ្កាហ្សា ជាពិសេសនៅភាគខាងជើង ដោយទាមទារឲ្យអ៊ីស្រាអែលអនុញ្ញាតឲ្យមានជំនួយបន្ថែមទៀត និងសម្របសម្រួលប្រតិបត្តិការមនុស្សធម៌។

WHO បានពិពណ៌នាអំពីស្ថានភាព «មហន្តរាយ» នៅលើដី។ ប្រមុខ WHO លោក Tedros Adhanom Ghebreyesus បាននិយាយថា នៅពេលដែលសង្រ្គាម ក្នុងតំបន់ហ្កាហ្សា បានផ្ទុះឡើងជាង ១ឆ្នាំមុន បន្ទាប់ពីមានការវាយប្រហារបង្ហូរឈាមរបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ នៅប្រទេសអ៊ីស្រាអែល ស្ទើរតែទាំងអស់នៃជនភៀសខ្លួន ដោយសារជម្លោះនេះ បានជ្រកកោននៅតាមអគារសាធារណៈ ឬជាមួយសមាជិកគ្រួសារ។

នៅឯទីស្នាក់ការកណ្តាលរបស់ WHO នាទីក្រុងហ្សឺណែវ ប្រទេសស្វីស លោក Ghebreyesus បានប្រាប់សន្និសីទសារព័ត៌មានថា៖ «ឥឡូវនេះ មនុស្ស ៩០ភាគរយកំពុងរស់នៅក្នុងតង់»។ លោកបានបន្ថែមថា៖ «ការរស់នៅបែបនេះធ្វើឲ្យពួកគេងាយរងគ្រោះកើតជំងឺផ្លូវដង្ហើម និងជំងឺផ្សេងទៀត ខណៈពេលដែល អាកាសធាតុត្រជាក់ ភ្លៀង និងទឹកជំនន់ ត្រូវបានគេរំពឹងថា នឹងប៉ះពាល់ដល់អសន្តិសុខស្បៀង និងកង្វះអាហារូបត្ថម្ភ»។

ស្ថានភាពនេះ គឺធ្ងន់ធ្ងរជាពិសេស នៅភាគខាងជើងដែលត្រូវបានរារាំង ជាកន្លែងដែលការវាយតម្លៃគាំទ្រដោយអង្គការសហប្រជាជាតិក្នុងខែនេះ បានបង្ហាញថា គ្រោះទុរ្ភិក្សកាន់តែជិតកើតមានហើយ។ WHO និងដៃគូរបស់ខ្លួន ក្នុងសប្តាហ៍នេះ បានបំពេញបេសកកម្មរយៈពេល ៣ថ្ងៃទៅកាន់ភាគខាងជើងតំបន់ហ្កាហ្សា ដោយបានទៅមើលទីតាំងសុខភាពជាច្រើនកន្លែង៕