ទីភ្នាក់ងារសារព័ត៌មានរដ្ឋ SANA បានរាយការណ៍ថា ជនស៊ីវិល ៤នាក់ ក្នុងនោះរួមទាំងនិស្សិត ២នាក់ផងដែរ ត្រូវបានសម្លាប់ នៅថ្ងៃសុក្រ (ទី២៩ ខែវិច្ឆិកា) នេះ នៅទីក្រុង Aleppo របស់ប្រទេសស៊ីរី ក្នុងហេតុការណ៍បាញ់ផ្លោងរបស់ពួកបះបោរលើអន្តេវាសិកដ្ឋានរបស់សាកលវិទ្យាល័យ។

ក្រុមឧទ្ទាមដឹកនាំដោយក្រុមសកម្មប្រយុទ្ធអ៊ិស្លាម Hayat Tahrir al-Sham (HTS) កាលពីថ្ងៃពុធ បានបើកការលុកលុយចូលទៅក្នុងទីក្រុងតូចៗ និងភូមិរាប់សិប ក្នុងខេត្ត Aleppo ភាគពាយ័ព្យ ដែលត្រូវបានគ្រប់គ្រងដោយកងកម្លាំងរដ្ឋាភិបាលរបស់ប្រធានាធិបតីស៊ីរី លោក Bashar al-Assad។

ប្រភពពីកងទ័ពស៊ីរី និងពួកឧទ្ទាម បានឲ្យដឹងថា នៅថ្ងៃបន្ទាប់ យន្តហោះចម្បាំងរុស្ស៊ី និងស៊ីរី បានទម្លាក់គ្រាប់បែកនៅភាគពាយ័ព្យស៊ីរី ដែលកាន់កាប់ដោយក្រុមឧទ្ទាម នៅជិតព្រំដែនជាមួយប្រទេសទួរគី ដើម្បីព្យាយាមរុញការវាយប្រហាររបស់ពួកបះបោរឲ្យថយទៅវិញ ដែលបានដណ្តើមកាន់កាប់ដែនដីជាលើកដំបូង ក្នុងរយៈពេលជាច្រើនឆ្នាំកន្លងមកនេះ។

គួរបញ្ជាក់ថា នេះគឺជាការវាយប្រហារដ៏ធំបំផុតលើកដំបូង គិតចាប់តាំងពីខែមីនា ឆ្នាំ២០២០ នៅពេលដែលរុស្ស៊ីដែលគាំទ្រលោក Assad និងទួរគីដែលគាំទ្រពួកឧទ្ទាម បានយល់ព្រមឲ្យមានបទឈប់បាញ់ ដើម្បីបញ្ចប់ការប្រយុទ្ធជាច្រើនឆ្នាំ ដែលបាននាំឲ្យមានការផ្លាស់ទីលំនៅ ចំពោះប្រជាជនស៊ីរីរាប់លាននាក់ ដែលប្រឆាំងនឹងការគ្រប់គ្រងរបស់លោក Assad៕