អាជ្ញាធរសុខាភិបាលដែលមានមូលដ្ឋាន នៅតំបន់ហ្កា ហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា ចំនួនអ្នកស្លាប់ជនជាតិប៉ាឡេស្ទីនពីប្រតិបត្តិការយោធាអ៊ីស្រាអែល ដែលកំពុងបន្តនៅតំបន់ហ្កាហ្សាស្ទ្រីប បានកើនឡើងដល់ ៤៤.៣៦៣ នាក់។ 

ក្នុងរយៈពេល ២៤ម៉ោង កន្លងទៅនេះ ប្រតិបត្តិការយោធាអ៊ីស្រាអែលនៅតំបន់ហ្កាហ្សា បានសម្លាប់មនុស្ស ៣៣នាក់ និងរបួស ១៣៧នាក់ទៀត ដែលនាំឲ្យចំនួនអ្នករបួសសរុប កើនឡើងដល់ ១០៥.0៧០ នាក់។ នេះបើយោងតាមសេចក្តីថ្លែងការណ៍។

នាយកដ្ឋានការពារជនស៊ីវិលនៃតំបន់ហ្កាហ្សា បានចេញសេចក្តីថ្លែងការណ៍មួយកាលពីថ្ងៃសុក្រ ដោយនិយាយថា តំបន់ Beit Lahia ភាគខាងជើងហ្កាហ្សាស្ទ្រីប ត្រូវបានវាយប្រហារពីរលើក ដោយកងទ័ពអ៊ីស្រាអែល នៅថ្ងៃនោះ ដោយបានបណ្តាលឲ្យមនុស្សសរុបចំនួន ៧៥នាក់ ស្លាប់ នៅក្នុងតំបន់នេះ។

សេចក្តីថ្លែងការណ៍ បានបញ្ជាក់ថា គ្រួសារជាច្រើនត្រូវបានសម្លាប់នៅក្នុងការវាយប្រហាររបស់កងទ័ព   អ៊ីស្រាអែល នៅភាគខាងជើងតំបន់ហ្កាហ្សាស្ទ្រីប ដោយមនុស្សជាច្រើន នៅតែកប់នៅក្រោមគំនរបាក់បែក ប៉ុន្តែអង្គភាពការពារជនស៊ីវិល គឺខ្វះខាតយ៉ាងខ្លាំងនូវបុគ្គលិក និងឧបករណ៍ដែលត្រូវការ ដើម្បីកាយយក កម្ទេចថ្មចេញ។

សេចក្តីថ្លែងការណ៍ បានបន្ថែមថា ចាប់ពីល្ងាចថ្ងៃព្រហស្បតិ៍ដល់ថ្ងៃសុក្រ កន្លែងជាច្រើននៅភាគកណ្តាល និងភាគខាងត្បូងតំបន់ហ្កាហ្សាស្ទ្រីប ត្រូវបានវាយប្រហារដោយកងទ័ពអ៊ីស្រាអែល បណ្តាលឲ្យមានអ្នកស្លាប់ និងរបួស។ ក្នុងចំណោមនោះ ការវាយប្រហារលើជំរំជនភៀសខ្លួន Nuseirat នៅភាគកណ្តាលហ្កា ហ្សា បានសម្លាប់មនុស្ស ១៩នាក់។ ស្ថាប័នវេជ្ជសាស្ត្រ បានអះអាងថា រថក្រោះអ៊ីស្រាអែលមួយចំនួន នៅតែស្ថិតនៅភាគខាងលិចនៃជំរំនេះ។