យោធាស៊ីរី និយាយកាលពីថ្ងៃសៅរ៍ថា ក្រមឧទ្ទាមបានចូលដល់តំបន់ជាច្រើនក្នុងទីក្រុង Aleppo អំឡុងការវាយប្រហារមួយដែលបានសម្លាប់ទាហានរាប់សិបនាក់ បង្ខំឲ្យកងទ័ពដាក់ពង្រាយឡើងវិញ និងជាការប្រឈមដ៏ធំបំផុតមួយសម្រាប់លោកប្រធានាធិបតី Bashar al-Assad នៅក្នុងរយៈពេលជាច្រើនឆ្នាំកន្លងមកនេះ ។

 ការវាយប្រហារដ៏គួរភ្ញាក់ផ្អើលដឹកនាំដោយក្រុមឧទ្ទាមអ៊ីស្លាម Hayat Tahrir al-Sham បានធ្វើឲ្យរំជើបរំជួលខ្សែត្រៀមមុខនៃសង្រ្គាមស៊ីវិលស៊ីរី ដែលបានស្ងប់ស្ងាត់អស់រយៈពេលជាច្រើនឆ្នាំមកហើយ ចាប់តាំងពីឆ្នាំ ២០២០មកម្ល៉េះ ធ្វើឲ្យមានការប្រយុទ្ធគ្នាឡើងវិញនៅក្នុងតំបន់ដ៏ផុយស្រួលរបស់ប្រទេសមួយនេះ ស្ថិតនៅជិតព្រំដែនទួរគី ។ កងទ័ពនិយាយថា ពួកគេបានត្រៀមខ្លួនរួចរាល់ក្នុងការវាយបកវិញ ដើម្បីស្តាអំណាចរដ្ឋ ។

 សេចក្តីថ្លែងការណ៍របស់មេបញ្ជាការកងទ័ពស៊ីរី គឺជាការទទួលស្គាល់ជាសាធារណៈលើកដំបូងដោយយោធាថា ក្រុមឧទ្ទាម បានចូលដល់ទីក្រុង Aleppo ដែលស្ថិតក្រោមការគ្រប់គ្រងទាំងស្រុងរបស់រដ្ឋ ចាប់តាំងពីកងកម្លាំងរដ្ឋាភិបាលគាំទ្រដោយរុស្ស៊ី និងអ៊ីរ៉ង់ បណ្តេញក្រុមឧទ្ទាមចេញអស់ កាលពីរយៈពេល ៨ឆ្នាំមុន ។

 កងទ័ពនិយាយថា ចំនួនដ៏ច្រើននៃក្រុមភេរវករ និងសមរភូមិប្រយុទ្ធជាច្រើន បានបង្ខំឲ្យកងកម្លាំងរបស់ពួកគេ ចុះប្រតិបត្តិការដាក់ពង្រាយកងកម្លាំងឡើងវិញ ដែលមានគោលដៅពង្រឹងខ្សែការពារដើម្បីទប់ទល់ការវាយប្រហារ ការពារអាយុជីវិតជនស៊ីវិល និងទាហាន ហើយនិងត្រៀមខ្លួនសម្រាប់ការវាយបកវិញ ។

 កងទ័ពនិយាយថា ក្រុមឧទ្ទាមបានចូលដល់តំបន់ជាច្រើននៅក្នុងទីក្រុង Aleppo ប៉ុន្តែការទម្លាក់គ្រាប់បែក បានបញ្ឈប់ពួកគេពីការបង្កើតទីតាំងឈរជើងចម្រុះ ។ ពួកគេបានសន្យាថានឹងបណ្តេញក្រុមឧទ្ទាមទាំងអស់នេះ ហើយនិងស្តាការគ្រប់គ្រងរបស់រដ្ឋឡើងវិញ ។

 ប្រភពព័ត៌មានចំនួន ២របស់ក្រុមឧទ្ទាម បានឲ្យដឹងថា ក្រុមបះបោរ ដណ្តើមបានផងដែរទីក្រុង Maraat al Numan ស្ថិតក្នុងខេត្ត Idlib ធ្វើឲ្យតំបន់ទាំងអស់នៅក្នុងខេត្តមួយនេះ ស្ថិតក្រោមការគ្រប់គ្រងរបស់ពួកគេ និងជាអ្វីមួយដែលធ្វើឲ្យប៉ះពាល់ធ្ងន់ធ្ងរមួយទៀតដល់លោក Assad ៕