ប្រទេសចិន នៅថ្ងៃអាទិត្យ (០១ ធ្នូ) នេះ បានប្តេជ្ញា "ការសងសឹកយ៉ាងខ្លាំងក្លា" សម្រាប់ការអនុម័តលក់សព្វាវុធរបស់សហរដ្ឋអាមេរិក នាពេលថ្មីៗនេះទៅឱ្យកោះតៃវ៉ាន់ ហើយបានដាក់ការតវ៉ាទៅកាន់ទីក្រុងវ៉ាស៊ីនតោន សម្រាប់ការរៀបចំឱ្យមេដឹកនាំកោះស្វ័យគ្រប់គ្រងតៃវ៉ាន់ ធ្វើដំណើរឆ្លងកាត់តាមរយៈសហរដ្ឋអាមេរិក។

គួរបញ្ជាក់ថា មន្ទីរបញ្ចកោណបាននិយាយកាលពីថ្ងៃសុក្រថា ក្រសួងការបរទេសបានអនុម័តលទ្ធភាពនៃការលក់គ្រឿងយុទ្ធោបករណ៍ប្រមាណ ៣៨៥លានដុល្លារ ជាគ្រឿងបន្លាស់ និងជំនួយសម្រាប់យន្តហោះចម្បាំង F-16 និងរ៉ាដាដល់តៃវ៉ាន់។ ការលក់នេះត្រូវបានប្រកាសប៉ុន្មានម៉ោងប៉ុណ្ណោះ មុនមេដឹកនាំតៃវ៉ាន់ លោក Lai Ching-te ចេញដំណើរទស្សនកិច្ចទៅកាន់ប្រទេសសម្ព័ន្ធមិត្តការទូតចំនួន៣ របស់ទីក្រុងតៃប៉ិ នៅប៉ាស៊ីហ្វិក ដោយឈប់សំចតនៅកោះហាវ៉ៃ និងកោះហ្គាំ (Guam) ដែលជាទឹកដីអាមេរិក។

ក្រសួងការបរទេសចិន បាននិយាយនៅក្នុងសេចក្តីថ្លែងការណ៍មួយថា ការលក់គ្រឿងយុទ្ធោបករណ៍នេះបានបញ្ជូន "សញ្ញាខុសឆ្គង" ដល់កងកម្លាំងឯករាជ្យរបស់តៃវ៉ាន់ និងធ្វើឱ្យខូចទំនាក់ទំនងអាមេរិក-ចិន។ នៅក្នុងសេចក្តីថ្លែងការណ៍ដាច់ដោយឡែកមួយ ក្រសួងបានបញ្ជាក់ថា ខ្លួនប្រឆាំងយ៉ាងដាច់ខាតចំពោះការផ្លាស់ប្តូរផ្លូវការណាមួយរវាងអាមេរិក និងកោះតៃវ៉ាន់ ហើយ "ថ្កោលទោសយ៉ាងខ្លាំងក្លា" លើទីក្រុងវ៉ាស៊ីនតោន ចំពោះការរៀបចំដំណើរសំចតនោះ។

ប្រទេសចិន ចាត់ទុកកោះតៃវ៉ាន់ ថាជាទឹកដីរបស់ខ្លួន ហើយកោះនេះជាបញ្ហាសំខាន់បំផុតក្នុងទំនាក់ទំនងជាមួយអាមេរិក ខណៈទីក្រុងប៉េកាំង មិនចូលចិត្តលោក Lai នោះទេ ដោយហៅលោកថាជា "ជនផ្ដាច់ខ្លួន"។ សហរដ្ឋអាមេរិក មានចំណងផ្លូវច្បាប់ក្នុងការផ្តល់ឱ្យកោះតៃវ៉ាន់ នូវមធ្យោបាយការពារខ្លួន ទោះបីជាមិនមានទំនាក់ទំនងការទូតផ្លូវការរវាងទីក្រុងវ៉ាស៊ីនតោន និងទីក្រុងតៃប៉ិក៏ដោយ ដែលនេះធ្វើឱ្យមានការខឹងសម្បារជាបន្តបន្ទាប់ពីទីក្រុងប៉េកាំង៕