ប្រភពពីក្រុមហាម៉ាស បាននិយាយថា ថ្នាក់ដឹកនាំក្រុមសកម្មប្រយុទ្ធប៉ាឡេស្ទីនមួយនេះ បានធ្វើកិច្ចពិភាក្សាជាមួយក្រុមមន្រ្តីសន្តិសុខអេហ្ស៊ីប កាលពីថ្ងៃអាទិត្យ (០១ ធ្នូ) កនុងការជំរុញថ្មីសម្រាប់បទឈប់បាញ់ក្នុងសង្រ្គាមដ៏បង្ហូរឈាមនៅដែនដីហ្កាហ្សា ហើយប្រភពពីមន្រ្តីអ៊ីស្រាអែល បានឱ្យដឹងថា នាយករដ្ឋមន្រ្តីអ៊ីស្រាអែល លោក Benjamin Netanyahu ក៏ធ្វើកិច្ចពិភាក្សាសន្តិសុខស្ដីពីរឿងនេះផងដែរ។

ដំណើរទស្សនកិច្ចរបស់ក្រុមហាម៉ាស ទៅកាន់ទីក្រុងគែរ គឺជាលើកទីមួយហើយចាប់តាំងពីសហរដ្ឋអាមេរិក បានប្រកាសកាលពីថ្ងៃពុធសប្ដាហ៍មុនថាខ្លួននឹងជំរុញកិច្ចខិតខំប្រឹងប្រែងឡើងវិញក្នុងកិច្ចសហប្រតិបត្តិការជាមួយប្រទេសកាតា អេហ្ស៊ីប និងទួរគី ដើម្បីចរចាបទឈប់បាញ់នៅហ្កាហ្សា ដែលនឹងរួមបញ្ចូលកិច្ចព្រមព្រៀងចំណាប់ថ្នូរ។

ទីប្រឹក្សាសន្តិសុខជាតិសេតវិមាន លោក Jake Sullivan បាននិយាយនៅថ្ងៃអាទិត្យថា លោកគិតថា បទឈប់បាញ់ និងកិច្ចព្រមព្រៀងចំណាប់ថ្នូរនៅក្នុងទឹកដីប៉ាឡេស្ទីន ឥឡូវនេះទំនងជាមានឱកាសកើតឡើងខ្ពស់ជាងពេលណាៗទាំងអស់ ប៉ុន្តែមិនបញ្ជាក់លម្អិតទេ។

គួររម្លឹកថា កិច្ចប្រឹងប្រែងធានាបទឈប់បាញ់ហ្កាហ្សា មកទល់ពេលនេះមិនទាន់មានផ្លែផ្កាឡើយ ដោយតាមរយៈការចរចាជាច្រើនលើកកន្លងមក ក្រុមហាម៉ាស បានទទូចថាកិច្ចព្រមព្រៀងណាមួយគួរតែដាក់បញ្ជូលការបញ្ចប់សង្គ្រាមជាអចិន្រ្តៃយ៍ជាមួយអ៊ីស្រាអែល ខណៈអ៊ីស្រាអែលនិយាយថា សង្រ្គាមនឹងបញ្ចប់នៅពេលណាដែលក្រុមហាម៉ាស លែងគ្រប់គ្រងតំបន់ហ្កាហ្សា ឬបង្កការគំរាមកំហែងដល់អ៊ីស្រាអែលទៀត៕