មេដឹកនាំកោះតៃវ៉ាន់ លោក Lai Ching-te (ឡៃ ឆឹង ទឺ) បានចាប់ផ្តើមថ្ងៃទី២ របស់លោក នៅសហរដ្ឋអាមេរិក កាលពីថ្ងៃអាទិត្យ (ទី១ ខែធ្នូ) ខណៈដែលប្រទេសចិនបានខឹងសម្បា ចំពោះការលក់អាវុធច្រើនឡើងៗរបស់អាមេរិកទៅឲ្យកោះនេះ និងជុំវិញការឈប់សំចតរបស់លោក Lai នៅកោះហាវ៉ៃ ដែលជាផ្នែកនៃដំណើរទស្សនកិច្ចរបស់លោក នៅតំបន់ប៉ាស៊ីហ្វិក។

គួរបញ្ជាក់ថា ប្រទេសចិន ដែលអះអាងថា កោះតៃវ៉ាន់ជាផ្នែកនៃដែនដីរបស់ខ្លួន ជំទាស់នឹងការទទួលស្គាល់ជាអន្តរជាតិណាមួយ ចំពោះកោះតៃវ៉ាន់ និងការប្រកាសអះអាងរបស់កោះនេះថា ជារដ្ឋអធិបតេយ្យ។ ហើយរដ្ឋាភិបាលទីក្រុងប៉េកាំង យកចិត្តទុកដាក់ជាពិសេស ចំពោះទំនាក់ទំនងផ្លូវការ រវាងកោះតៃវ៉ាន់ និងសហរដ្ឋអាមេរិកដែលជាអ្នកគាំទ្រដ៏សំខាន់បំផុត និងជាអ្នកផ្គត់ផ្គង់អាវុធដ៏ធំបំផុតរបស់កោះនេះ។

ក្នុងសុន្ទរកថាជាសាធារណៈលើកដំបូងរបស់លោកនៃដំណើរទស្សនកិច្ចនេះ កាលពីថ្ងៃសៅរ៍ចុងសប្ដាហ៍កន្លងមក លោក Lai បាននិយាយថា យើងត្រូវតែ «រួមគ្នាតស៊ូ ដើម្បីការពារសង្រ្គាម» ដោយព្រមានថា មិនមាន «អ្នកឈ្នះ» ពីការមានជម្លោះនោះឡើយ។ នៅមុនថ្ងៃនៃការធ្វើដំណើររយៈពេល ១សប្តាហ៍របស់លោក សហរដ្ឋអាមេរិកបានយល់ព្រមលើសំណើលក់គ្រឿងបន្លាស់សម្រាប់យន្តហោះ F-16 និងប្រព័ន្ធរ៉ាដា ព្រមទាំងឧបករណ៍ទំនាក់ទំនងផ្សេងទៀត នៅក្នុងកិច្ចព្រមព្រៀងដែលមានតម្លៃសរុប ៣៨៥លានដុល្លារ។

មិនខុសពីពេលកន្លងមកដែរ ក្រោយមានការលក់ដូរនោះ ក្រសួងការបរទេសរបស់ចិន បានអំពាវនាវកាលពីចុងសប្តាហ៍ឲ្យសហរដ្ឋអាមេរិក «បញ្ឈប់ជាបន្ទាន់នូវការបំពាក់អាវុធដល់កោះតៃវ៉ាន់ ហើយបញ្ឈប់ជំរុញ និងគាំទ្រកងកម្លាំងបំបែកខ្លួន «ឯករាជ្យរបស់កោះតៃវ៉ាន់»។ ក្រសួងបានបន្ថែមថា ប្រទេសចិននឹងចាត់វិធានការតបតយ៉ាងខ្លាំងក្លា និងម៉ឺងម៉ាត់ ដើម្បីការពារអធិបតេយ្យភាពជាតិ សន្តិសុខ និងបូរណភាពទឹកដីដោយឥតរាថយជាដាច់ខាត។

នៅក្នុងសេចក្តីថ្លែងការណ៍ដាច់ដោយឡែកមួយ ក្រសួងការបរទេស បានឲ្យដឹងថា ប្រទេសចិន «ថ្កោលទោសយ៉ាងខ្លាំងក្លា» ចំពោះសហរដ្ឋអាមេរិក សម្រាប់ការឈប់សំចតរបស់លោក Lai ហើយថា ខ្លួនបានដាក់ពាក្យតវ៉ាជាមួយសហរដ្ឋអាមេរិក៕