អធិការបតីអាល្លឺម៉ង់ លោក Olaf Scholz បានធ្វើទស្សនកិច្ចដ៏គួរឲ្យភ្ញាក់ផ្អើលទៅកាន់ទីក្រុងគីវ នៅថ្ងៃចន្ទ (ទី២ ខែធ្នូ) នេះ ដោយប្តេជ្ញាថា ប្រទេសលោកនឹងនៅតែជាអ្នកគាំទ្រដ៏ធំបំផុតរបស់អ៊ុយក្រែន នៅអឺរ៉ុប ហើយសន្យាផ្តល់ជំនួយយោធា ក្នុងខែនេះ ដែលមានតម្លៃ ៦៥០លានអឺរ៉ូ (៦៨៣លានដុល្លារ)។

គួរបញ្ជាក់ថា ដំណើរទស្សនកិច្ច ដែលជាលើកទី២ របស់លោក Scholz គិតចាប់តាំងពីការលុកលុយពេញលេញរបស់រុស្ស៊ីលើអ៊ុយក្រែន កាលពីជិត ៣ឆ្នាំមុន បង្ហាញនូវការគាំទ្ររបស់អាល្លឺម៉ង់ នៅក្នុងពេលវេលានៃភាពមិនច្បាស់លាស់ មុនពេលការវិលត្រលប់ទៅកាន់សេតវិមានរបស់លោក Donald Trump និងខណៈដែលកងកម្លាំងរុស្ស៊ីដណ្ដើមបានដែនដីជាបន្តបន្ទាប់។

លោក Scholz នឹងជួបពិភាក្សាជាមួយប្រធានាធិបតី លោក Volodymyr Zelenskiy ដែលគ្រោងនឹងជំរុញឲ្យអង្គការណាតូកោះអញ្ជើញអ៊ុយក្រែនចូលរួមជាមួយសម្ព័ន្ធភាពយោធា នៅក្នុងកិច្ចប្រជុំ នាទីក្រុងប្រ៊ុចសែល ប្រទេសបែលហ្ស៊ិក ក្នុងសប្តាហ៍នេះ។ ដំណើរទស្សនកិច្ចនេះក៏អាចផ្តល់មធ្យោបាយមួយ ដើម្បីឲ្យអធិការបតីអាល្លឺម៉ង់ប្រឹងប្រែងពង្រឹងការទទួលស្គាល់គោលនយោបាយការបរទេសរបស់លោក ខណៈដែលលោកប្រឈមនឹងការតស៊ូដ៏តានតឹង ដើម្បីបានជាប់ឆ្នោតឡើងវិញ នៅឯការបោះឆ្នោតមុនអាណត្តិ ក្នុងខែកុម្ភៈ បន្ទាប់ពីរដ្ឋាភិបាលចម្រុះរបស់លោក បានដួលរលំ នៅក្នុងខែវិច្ឆិកា។

កំណត់ត្រាផ្ទាល់ខ្លួនរបស់លោក ជុំវិញការគាំទ្រអ៊ុយក្រែន គឺស្ថិតនៅក្រោមការពិនិត្យតាមដាន ទាំងពីអ្នកដែលចង់លោកលោកបន្តធ្វើទៀត ដើម្បីជួយទីក្រុងគីវ និងម្ខាងទៀត ពីអ្នកបោះឆ្នោតដែលចង់ឲ្យអាល្លឺម៉ង់ដកខ្លួនកុំបញ្ជូនអាវុធ និងជំនួយទៅឲ្យអ៊ុយក្រែន៕