ប្រភពពីស៊ីរី និងអ៊ីរ៉ាក់ នៅថ្ងៃចន្ទ (ទី២ ខែធ្នូ) នេះ បាននិយាយថា យុទ្ធជនរាប់រយនាក់មកពីកងជីវពលអ៊ីរ៉ាក់គាំទ្រដោយអ៊ីរ៉ង់ បានឆ្លងចូលទៅក្នុងប្រទេសស៊ីរីពេញមួយយប់ ដើម្បីជួយរដ្ឋាភិបាលប្រយុទ្ធប្រឆាំងនឹងពួកឧទ្ទាមដែលបានដណ្តើមកាន់កាប់ទីក្រុង Aleppo កាលពីសប្តាហ៍មុន ហើយទីក្រុងតេអេរ៉ង់បានសន្យាថា នឹងជួយដល់រដ្ឋាភិបាលក្រុងដាម៉ាស។

ប្រភពសន្តិសុខអ៊ីរ៉ាក់ ២រូប បានប្រាប់ថា កាលពីយប់ថ្ងៃអាទិត្យ (ទី១ ខែធ្នូ) យ៉ាងហោចណាស់មានយុទ្ធជន ៣០០នាក់ ដោយភាគច្រើនមកពីក្រុម Badr និង Nujaba បានធ្វើដំណើរឆ្លងកាត់ចូលទៅស៊ីរី ដោយប្រើផ្លូវកខ្វក់ ដើម្បីគេចពីការឆ្លងកាត់ព្រំដែនផ្លូវការ។

ប្រភពយោធាស៊ីរីជាន់ខ្ពស់មួយរូប បាននិយាយថា៖ «មានកងកម្លាំងថ្មីត្រូវបានបញ្ជូនមក ដើម្បីជួយសមមិត្តរបស់យើង នៅសមរភូមិជួរមុខ នាភាគខាងជើង»។ ប្រភពនោះបន្ថែមថា យុទ្ធជនទាំងនោះបានឆ្លងកាត់ជាក្រុមតូចៗ ដើម្បីគេចពីការវាយប្រហារតាមអាកាស។

គួរបញ្ជាក់ថា ក្រុមក្នុងតំបន់ដែលជាសម្ព័ន្ធមិត្តរបស់អ៊ីរ៉ង់ បានដើរតួនាទីយ៉ាងសំខាន់ជាយូរមកហើយ ចំពោះជោគជ័យរបស់កងកម្លាំងគាំទ្ររដ្ឋាភិបាល ក្នុងការបង្ក្រាបក្រុមឧទ្ទាម ដែលបានក្រោកឡើងប្រឆាំងនឹងប្រធានាធិបតី លោក Bashar al-Assad ក្នុងឆ្នាំ២០១១ ហើយពួកគេបានបន្តមានមូលដ្ឋានក្នុងរយៈពេលដ៏យូរ នៅស៊ីរី៕