អូឡាំពិក៖ អ្នកដែលត្រូវចូលរួមព្រឹត្តិការណ៍អូឡាំពិករដូវរងារទីក្រុងប៉េកាំងឆ្នាំក្រោយ មិនថាអត្តពលិក ក្រុមការងារពាក់ព័ន្ធ អ្នកកាសែតជាដើម បើមិនបានចាក់វ៉ាក់សាំងប្រឆាំងកូវីដ-១៩ ទេនោះពួកគេនឹងត្រូវធ្វើចត្តាឡីស័កដល់ទៅ ២១ថ្ងៃពេលមកដល់ទឹកដីចិន។ នៅសល់ ១០០ថ្ងៃទៀតប៉ុណ្ណោះព្រឹត្តិការណ៍អូឡាំពិករដូវរងាឆ្នាំ២០២២ នៅទីក្រុងប៉េកាំងនឹងឈានចូលមកដល់ ខណៈចិនបានបញ្ចេញសៀវភៅណែនាំទី១។
សៀវភៅណែនាំនេះមានលក្ខណៈតឹងរ៉ឺងជាងជប៉ុនដែលបានបោះពុម្ពនៅអូឡាំពិកទីក្រុងតូក្យូ ដែលក្នុងនោះសុទ្ធតែបានចែងអំពីវិធានការសុខាភិបាលដែលត្រូវបានអនុវត្តសំរាប់មនុស្សពាក់ព័ន្ធទាំងអស់ក្នុងព្រឹត្តិការណ៍។ អ្នកដែលបានចាក់វ៉ាក់សាំងពេញលេញមិនត្រូវបានធ្វើចត្តាឡីស័ក ២១ថ្ងៃឡើយ តែពួកគេត្រូវធ្វើតេស្តជាប្រចាំរៀងរាល់ថ្ងៃនៅតំបន់អូឡាំពិកនៅទីក្រុងប៉េកាំង យ៉ានគីង និងហ្សាងជែគូ។ អ្នកចូលរួមទាំងអស់តម្រូវឱ្យពាក់ម៉ាសជាប្រចាំលើកលែងតែពេលហ្វឹកហាត់ ពេលប្រកួត ពេលហូបអាហារ ពេលគេងជាដើម។ អ្វីដែលខុសពីជប៉ុននោះគឺ អូឡាំពិករដូវរងាខាងមុខនេះនឹងបើកឱ្យទស្សនិកជនចូលទស្សនា តែមិនមែនជនបរទេសឡើយគឺបើកតែប្រជាជនដែលរស់នៅក្នុងប្រទេសចិនប៉ុណ្ណោះ។ ការប្រកួតអូឡាំពិករដូវរងាឆ្នាំ២០២២ នឹងចាប់ផ្តើមពីថ្ងៃទី៤ ខែកុម្ភៈឆ្នាំក្រោយដល់ថ្ងៃទី២០ ខែដដែល ខណៈប៉ារ៉ាឡាំពិករដូវរងានឹងចាប់ផ្តើមពីថ្ងៃទី៤ ខែមិនាដល់ថ្ងៃទី១៣ ខែដដែល៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
