ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានព្រមានកាលពីថ្ងៃចន្ទ (០២ ធ្នូ) ថានឹងមាន "បញ្ហាកាន់តែធ្ងន់ធ្ងរ" នៅមជ្ឈិមបូព៌ា ប្រសិនបើចំណាប់ថ្នូរដែលត្រូវបានឃុំខ្លួននៅតំបន់ហ្កាហ្សាស្រ្ទីប មិនត្រូវបានដោះលែងមុនថ្ងៃឡើងកាន់តំណែងរបស់លោកនៅថ្ងៃទី២០ ខែមករា ឆ្នាំក្រោយទេនោះ។

គួររម្លឹកថា ក្នុងអំឡុងពេលនៃការវាយប្រហារដ៏បង្ហូរឈាមរបស់ក្រុមហាម៉ាស ក្នុងឆ្នាំ២០២៣ ទៅលើអ៊ីស្រាអែល ពួកសកម្មប្រយុទ្ធដឹកនាំដោយក្រុមនេះបានចាប់ខ្លួនមនុស្សជាង ២៥០នាក់ នេះបើយោងតាមតួលេខសរុបរបស់អ៊ីស្រាអែល រួមទាំងជនជាតិអ៊ីស្រាអែលសញ្ជាតិអាមេរិក ២នាក់ផងដែរ។ ប្រហែលពាក់កណ្តាលប៉ុណ្ណោះនៃចំណាប់ថ្នូរបរទេស និងអ៊ីស្រាអែលទាំង ១០១នាក់នៅហ្កាហ្សា ត្រូវគេជឿថានៅមានជីវិត។

លោក Trump បានចេញការព្រមានយ៉ាងច្បាស់លាស់បំផុតអំពីជោគវាសនារបស់ចំណាប់ថ្នូរចាប់តាំងពីការជាប់ឆ្នោតក្នុងខែវិច្ឆិកា ដោយលើកឡើងលើប្រព័ន្ធផ្សព្វផ្សាយសង្គមថា៖ "ប្រសិនបើចំណាប់ថ្នូរមិនត្រូវបានដោះលែងមុនថ្ងៃទី២០ ខែមករា ឆ្នាំ២០២៥ ទេ នោះនឹងមានការបង់ខាតកាន់តែធ្ងន់ធ្ងរនៅមជ្ឈិមបូព៌ា ជាពិសេសសម្រាប់អ្នកដែលបានប្រព្រឹត្តអំពើឃោរឃៅទាំងនេះប្រឆាំងនឹងមនុស្សជាតិ"។

លោក Trump បន្ថែមថា "អ្នកទទួលខុសត្រូវ នឹងត្រូវរងការវាយប្រហារដ៏ខ្លាំងក្លាក្នុងប្រវត្តិសាស្ត្រដ៏យូរអង្វែងរបស់សហរដ្ឋអាមេរិក"។

គួរបញ្ជាក់ថា កិច្ចព្រមព្រៀងបទឈប់បាញ់ និងការដោះដូរចំណាប់ថ្នូរជុំថ្មីនៅហ្កាហ្សា ជាមួយនឹងអ្នកទោសប៉ាឡេស្ទីនដែលជាប់ពន្ធនាគារនៅអ៊ីស្រាអែល ពុំមានផ្លែផ្កាជាច្រើនខែ ដោយភាគីជម្លោះទាំងពីរបានចោទដាក់គ្នាទៅមកចំពោះភាពជាប់គាំងនេះ៕