អាជ្ញាធរការពារជាតិកោះតៃវ៉ាន់ បាននិយាយនៅថ្ងៃអង្គារ (០៣ ធ្នូ) នេះថា ខ្លួនកំពុងឃ្លាំមើលចលនារបស់នាវាផ្ទុកយន្តហោះចិន និងវាយតម្លៃសកម្មភាពយោធារបស់ចិន ខណៈប្រភពសន្តិសុខបាននិយាយថា ទីក្រុងប៉េកាំង អាចធ្វើហ្គេមសង្គ្រាមថ្មី (សមយុទ្ធទ្រង់ទ្រាយធំ) ភ្លាមៗនៅចុងសប្តាហ៍នេះ។

ប្រទេសចិន ដែលអះអាងសិទ្ធិលើកោះស្វ័យគ្រប់គ្រងតៃវ៉ាន់ ថាជាទឹកដីរបស់ខ្លួន បានធ្វើហ្គេមសង្រ្គាមចំនួនពីរជុំរួចទៅហើយជុំវិញកោះនេះ ហើយកងកម្លាំងរបស់ខ្លួនកំពុងប្រតិបត្តិការជាប្រចាំនៅក្បែរនោះ។

ថ្លែងនៅក្នុងសន្និសីទសារព័ត៌មានជាប្រចាំ អ្នកនាំពាក្យអាជ្ញាធរការពារជាតិតៃវ៉ាន់ បាននិយាយថា កោះតៃវ៉ាន់ កំពុងតាមដានទីតាំងនាវាផ្ទុកយន្តហោះ ឡាវនីង (Liaoning) របស់ចិន ប៉ុន្តែមិនអាចផ្តល់ព័ត៌មានលម្អិតបានទេ។

ចិន មិនពេញចិត្តយ៉ាងខ្លាំងចំពោះមេដឹកនាំកោះតៃវ៉ាន់ លោក Lai Ching-te ដោយហៅលោកថាជា "ជនផ្ដាច់ខ្លួន" ហើយប្រភពបានប្រាប់សារព័ត៌មានរ៉យទ័រថា ទីក្រុងប៉េកាំង អាចចាប់ផ្តើមធ្វើសមយុទ្ធថ្មី ដើម្បីឱ្យស្របពេលជាមួយនឹងដំណើរទស្សនកិច្ចរបស់លោកទៅកាន់ប៉ាស៊ីហ្វិកក្នុងសប្តាហ៍នេះ ដែលនឹងបញ្ចប់នៅថ្ងៃទី០៦ ធ្នូ ដោយរួមមានដំណើរសំចតនៅកោះហាវ៉ៃ និងកោះហ្គាំ របស់សហរដ្ឋអាមេរិក។