នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃចន្ទ បានចោទប្រកាន់ក្រុមហេសបូឡាថា បានរំលោភលើកិច្ចព្រមព្រៀងបទឈប់បាញ់ ហើយបានប្តេជ្ញាថា នឹងឆ្លើយតបយ៉ាងម៉ឺងម៉ាត់ បន្ទាប់ពីក្រុមនេះ បានបាញ់កាំភ្លើងត្បាល់ពីរគ្រាប់ នៅជិតព្រំដែន នៅពេលព្រឹក។

នៅក្នុងសេចក្តីថ្លែងការណ៍មួយ លោក ណេតាន់យ៉ាហ៊ូ បាននិយាយថា គ្រាប់កាំភ្លើងត្បាល់ដែលបានធ្លាក់ នៅទីវាលចំហ ដោយមិនបណ្តាលឲ្យមានអ្នកស្លាប់ និងរបួសនោះ គឺជា «ការរំលោភយ៉ាងធ្ងន់ធ្ងរ»នៃបទឈប់បាញ់ ដែលបានចូលជាធរមាន តាំងពីថ្ងៃទី ២៧ ខែវិច្ឆិកា ហើយថា «អ៊ីស្រាអែល នឹងឆ្លើយតបយ៉ាងលើសលប់»។

លោក បាននិយាយថា៖«យើងប្តេជ្ញាបន្តអនុវត្តបទឈប់បាញ់ និងឆ្លើយតបចំពោះការរំលោភបំពានណាមួយដោយក្រុមហេសបូឡា មិនថាតូច ឬធ្ងន់ធ្ងរយ៉ាងនោះទេ»។

នៅក្នុងការបង្ហោះនៅលើប្រព័ន្ធផ្សព្វផ្សាយសង្គម X រដ្ឋមន្ត្រីការពារជាតិអ៊ីស្រាអែល Israel Katz ក៏បានព្រមានថា ការវាយប្រហារនោះ«នឹងត្រូវបានឆ្លើយតបយ៉ាងធ្ងន់ធ្ងរបំផុត»។

ក្រុមហេសបូឡា ដែលបានអះអាងទទួលខុសត្រូវចំពោះការវាយប្រហារនោះ បាននិយាយថា ខ្លួនបានកំណត់គោលដៅលើប៉ុស្តិ៍យោធាអ៊ីស្រាអែល នៅក្នុងតំបន់មានជម្លោះ ដែលគេស្គាល់ថា តំបន់ Mount Dov ក្នុងប្រទេសអ៊ីស្រាអែល និង Shebaa Farms ក្នុងប្រទេសលីបង់។ ក្រុមនេះ បានពណ៌នាការវាយប្រហារ នេះថា ជា «ការឆ្លើយតបការពារដោយការព្រមាន» ទៅនឹងអ្វីដែលហៅថា«ការរំលោភបំពាន»បទឈប់បាញ់ម្តងហើយម្តងទៀតដោយអ៊ីស្រាអែល។