មន្ត្រីជាន់ខ្ពស់លីបង់ បានជំរុញទីក្រុងវ៉ាស៊ីនតោន និងទីក្រុងប៉ារីសដាក់សម្ពាធលើអ៊ីស្រាអែល ដើម្បីឲ្យប្រកាន់ខ្ជាប់កិច្ចព្រមព្រៀងបទឈប់បាញ់ បន្ទាប់ពីមាននូវប្រតិបត្តិការយោធារាប់សិបលើក នៅលើដែនដីរបស់ប្រទេសលីបង់ ដែលទីក្រុងបេរូតបានចាត់ទុកថា ជាការរំលោភបំពាន។ នេះបើតាមការឲ្យដឹងពីប្រភពនយោបាយជាន់ខ្ពស់របស់លីបង់ ២រូប ដែលបានប្រាប់សារព័ត៌មាន Reuters នាថ្ងៃអង្គារ (ទី៣ ខែធ្នូ) នេះ។

ការវាយប្រហារបង្ហូរឈាមរបស់អ៊ីស្រាអែលទៅលើលីបង់ភាគខាងត្បូង និងការបាញ់បង្ហោះគ្រាប់រ៉ូកែតរបស់ក្រុមហេសបូឡាលើទីតាំងយោធាអ៊ីស្រាអែល កាលពីថ្ងៃចន្ទ (ទី២ ខែធ្នូ) បានធ្វើឲ្យបទឈប់បាញ់ រវាងភាគីទាំង២ ដែលសម្របសម្រួលដោយសហរដ្ឋអាមេរិក ធ្លាក់ចូលទៅក្នុងស្ថានភាពកាន់តែផុយស្រួយខ្លាំងឡើងៗ ដោយមានរយៈពេលតិចជាងមួយសប្តាហ៍ បន្ទាប់ពីកិច្ចព្រមព្រៀងនេះចូលជាធរមាន។

ប្រភពបានប្រាប់ឲ្យដឹងថា កាលពីល្ងាចថ្ងៃចន្ទ នាយករដ្ឋមន្ត្រីចាំផ្ទះរបស់លីបង់ លោក Najib Mikati និងប្រធានសភា លោក Nabih Berri ដែលជាសម្ព័ន្ធមិត្តជិតស្និទ្ធរបស់ក្រុមហេសបូឡា ដែលបានចូលរួមចរចាតំណាងឲ្យប្រទេសលីបង់ បាននិយាយទៅកាន់មន្ត្រី នៅសេតវិមាន និងប្រធានាធិបតីបារាំង ហើយបានសម្តែងការព្រួយបារម្ភ អំពីស្ថានភាពនៃបទឈប់បាញ់នេះ។

ទាំងប្រធានាធិបតីបារាំង ឬក្រសួងការបរទេស មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។ តែរដ្ឋមន្ត្រីការបរទេសបារាំង លោក Jean-Noel Barrot បាននិយាយទៅកាន់សមភាគីអ៊ីស្រាអែល លោក Gideon Saar កាលពីថ្ងៃចន្ទ ដោយលើកឡើងថា ភាគីទាំង២ គួរតែប្រកាន់ខ្ជាប់នូវបទឈប់បាញ់នេះ។ 

ចំណែកអ្នកនាំពាក្យក្រសួងការបរទេសអាមេរិក លោក Matt Miller បានប្រាប់អ្នកសារព័ត៌មានកាលពីថ្ងៃចន្ទថា បទឈប់បាញ់ «កំពុងដំណើរការ» ហើយថា សហរដ្ឋអាមេរិកបាន «រំពឹងថា អាចនឹងមានការរំលោភបំពាន»៕