អាជ្ញាធរ ក្នុងតំបន់ បានប្រាប់សារព័ត៌មាន Reuters ថា ជំងឺដ៏ចម្លែកមួយប្រភេទ បានបណ្ដាលឲ្យមនុស្ស ១៤៣នាក់ស្លាប់ នៅខេត្តភាគនិរតីនៃសាធារណរដ្ឋប្រជាធិបតេយ្យកុងហ្គោ ក្នុងខែវិច្ឆិកា។

កាលពីថ្ងៃចន្ទ (ទី២ ខែធ្នូ) អភិបាលរងខេត្ត Kwango លោក Remy Saki និងរដ្ឋមន្ត្រីសុខាភិបាលខេត្ត លោក Apollinaire Yumba បាននិយាយថា អ្នកឆ្លងជំងឺ មានរោគសញ្ញាដូចជំងឺគ្រុនផ្តាសាយ ដែលរួមមានគ្រុនក្តៅខ្លាំង និងឈឺក្បាលខ្លាំង។

ក្រុមគ្រូពេទ្យត្រូវបានបញ្ជូនទៅតំបន់សុខភាព Panzi ដើម្បីប្រមូលសំណាក និងធ្វើការវិភាគ ដើម្បីកំណត់អត្តសញ្ញាណជំងឺនេះ។ មេដឹកនាំសង្គមស៊ីវិល លោក Cephorien Manzanza បានប្រាប់សារព័ត៌មាន Reuters ថា ស្ថានការណ៍នេះ ធ្វើឲ្យមានការព្រួយបារម្ភយ៉ាងខ្លាំង ខណៈចំនួនអ្នកឆ្លងបន្តកើនឡើង។ លោក Manzanza បាននិយាយថា៖ «Panzi គឺជាតំបន់សុខភាពជនបទ ដូច្នេះ មានបញ្ហាផ្គត់ផ្គង់ថ្នាំ»។

លោក Saki និងលោក Yumba បាននិយាយថា អ្នកជំងឺស្លាប់នៅក្នុងផ្ទះរបស់ពួកគេ ដោយកង្វះខាតការព្យាបាល។ អ្នកជំនាញផ្នែករោគរាតត្បាត ក្នុងតំបន់ បាននិយាយថា ស្ត្រី និងកុមារ គឺជាអ្នករងគ្រោះធ្ងន់ធ្ងរបំផុតពីជំងឺនេះ។

អ្នកនាំពាក្យរបស់អង្គការសុខភាពពិភពលោក (WHO) នៅថ្ងៃអង្គារ (ទី៣ ខែធ្នូ) នេះ បាននិយាយថា ទីភ្នាក់ងារសុខភាពរបស់អង្គការសហប្រជាជាតិត្រូវបានជូនដំណឹង អំពីវត្តមាននៃជំងឺនេះ កាលពីសប្តាហ៍មុន ហើយស្ថាប័នកំពុងធ្វើការជាមួយនឹងក្រសួងសុខភាពសាធារណៈរបស់ប្រទេសកុងហ្គោ ដើម្បីស្រាវជ្រាវបន្ថែម៕