សមាគមឧស្សាហកម្មធំបំផុតទាំងបួនរបស់ចិននិយាយកាលពីថ្ងៃអង្គារសប្ដាហ៍នេះក្នុងការឆ្លើយតបសម្របសម្រួលដ៏កម្រមួយចំពោះការទប់ស្កាត់របស់ទីក្រុងវ៉ាស៊ីនតោនលើក្រុមហ៊ុនផលិតបន្ទះឈីបរបស់ចិនថា ក្រុមហ៊ុនរបស់ចិនគួរតែប្រយ័ត្នចំពោះការទិញបន្ទះឈីបរបស់អាមេរិក ព្រោះវត្ថុទាំងនោះលែងមានសុវត្ថិភាពទៀតហើយនិងងាកមកទិញផលិតផលក្នុងស្រុកវិញ ប៉ុន្តែពុំបានបញ្ជាក់លម្អិតទេ។

ប្រទេសទាំងពីរបានដាក់គោលដៅសេដ្ឋកិច្ចរបស់គ្នាទៅវិញទៅមកក្នុងរយៈពេលប៉ុន្មានថ្ងៃចុងក្រោយនេះដោយបង្កើនភាពតានតឹងសូម្បីតែមុនពេលប្រធានាធិបតីជាប់ឆ្នោតរបស់សហរដ្ឋអាមេរិក Donald Trump ត្រឡប់ទៅកាន់សេតវិមានជាថ្មីក្នុងខែមករាឆ្នាំ២០២៥ក៏ដោយ។ លោក Trump បានសន្យាថានឹងដំឡើងពន្ធធ្ងន់លើទំនិញនាំចូលរបស់ចិន ដែលនឹងដុតបញ្ឆេះឱ្យមានសង្គ្រាមពាណិជ្ជកម្មឡើងវិញពីអាណត្តិប្រធានាធិបតីរយៈពេល ៤ឆ្នាំដំបូងរបស់លោក។

ការព្រមានរបស់សមាគមឧស្សាហកម្មនេះបានកើតឡើងបន្ទាប់ពីសហរដ្ឋអាមេរិកកាលពីថ្ងៃចន្ទបានបើកការបង្ក្រាបលើកទីបីរបស់ខ្លួនក្នុងរយៈពេលបីឆ្នាំលើឧស្សាហកម្មពាក់កណ្ដាលចម្លងរបស់ប្រទេសចិន ដោយបានទប់ស្កាត់ការនាំចេញទៅកាន់ក្រុមហ៊ុនចំនួន ១៤០ រួមទាំងក្រុមហ៊ុនផលិតឧបករណ៍បន្ទះឈីប Naura Technology Group ។

ការលើកឡើងរបស់ពួកគេអាចប៉ះពាល់ដល់ក្រុមហ៊ុនយក្សរបស់អាមេរិកដូចជា Nvidia, AMD និង Intel ទោះបីជាមានការគ្រប់គ្រងលើការនាំចេញក៏ដោយនោះ បានគ្រប់គ្រងដើម្បីបន្តលក់ផលិតផលនៅក្នុងទីផ្សារប្រទេសចិន។ ក្រុមហ៊ុនទាំងបីពុំបានឆ្លើយតបភ្លាមៗចំពោះសំណើសុំការអត្ថាធិប្បាយរបស់សារព័ត៌មាន Reuters ទេ។

ក្រុងប៉េកាំងកាលពីថ្ងៃអង្គារក៏បានហាមប្រាមការនាំចេញសារធាតុរ៉ែដ៏កម្រដែលប្រើក្នុងកម្មវិធីយោធា ផ្ទាំងពន្លឺព្រះអាទិត្យ solar ខ្សែកាបអុបទិក និងដំណើរការផលិតផ្សេងៗទៀត។ អ្នកនាំពាក្យក្រុមប្រឹក្សាសន្តិសុខជាតិសេតវិមាននិយាយថាអាមេរិកនឹងចាត់វិធានការចាំបាច់រារាំងសកម្មភាពបង្ខិតបង្ខំ ផ្សេងទៀតពីប្រទេសចិន និងបន្តកិច្ចខិតខំប្រឹងប្រែងពង្រីកខ្សែសង្វាក់ផ្គត់ផ្គង់ឱ្យចេញពីប្រទេសនោះ៕