រុស្ស៊ី និងសហរដ្ឋអាមេរិក បានប៉ះទង្គិចពាក្យសម្ដីគ្នាយ៉ាងតានតឹងនៅអង្គការសហប្រជាជាតិ កាលពីថ្ងៃអង្គារ (០៣ ធ្នូ) ដោយចោទប្រកាន់គ្នាទៅវិញទៅមកថាបានគាំទ្រអំពើភេរវកម្ម ក្នុងអំឡុងពេលកិច្ចប្រជុំក្រុមប្រឹក្សាសន្តិសុខ ជុំវិញការកើនឡើងភ្លាមៗនៃការប្រយុទ្ធគ្នានៅក្នុងប្រទេសស៊ីរី។

អគ្គរដ្ឋទូតរងអាមេរិកប្រចាំអង្គការសហប្រជាជាតិ លោក Robert Wood បានអំពាវនាវឱ្យមានការបន្ធូរបន្ថយការប្រយុទ្ធគ្នានៅស៊ីរី ហើយចោទប្រកាន់កងកម្លាំងរបស់ប្រធានាធិបតីស៊ីរី លោក Bashar al-Assad និងអ្នកគាំទ្ររបស់ខ្លួនគឺរុស្ស៊ី ថាបានបង្កឱ្យជនស៊ីវិលស្លាប់បាត់បង់ជីវិតក្នុងការវាយប្រហារប្រឆាំងក្រុមឧទ្ទាម លើសាលារៀន និងមន្ទីរពេទ្យ។

នៅក្នុងការឆ្លើយតបដែលសំដៅទៅកាន់លោក Wood ឯកអគ្គរដ្ឋទូតនៅអង្គការសហប្រជាជាតិរបស់រុស្ស៊ី លោក Vassily Nebenzia ចោទបកទៅវិញថា "អ្នកមិនអាចហៅភាពក្លាហានក្នុងការថ្កោលទោសការវាយប្រហារភេរវកម្ម ជាការប្រឆាំងនឹងជនស៊ីវិលរបស់ស៊ីរីនោះទេ"។

ការប៉ះទង្គិចដ៏តានតឹងនេះកើតឡើង បន្ទាប់ពីក្រុមឧទ្ទាមស៊ីរី បានដណ្តើមកាន់កាប់ទីក្រុងអាឡិបប៉ូ (Aleppo) កាលពីសប្តាហ៍មុន ក្នុងការវាយប្រហារមួយដែលផ្តួចផ្តើមដោយក្រុមសកម្មប្រយុទ្ធ ហាយ៉ាត់ តារឺ អាល់-ស្ហាម (Hayat Tahrir al-Sham) ឬក្រុម HTS។ ដោយពីមុនត្រូវបានគេស្គាល់ថាជារណសិរ្ស នូស្រា (Nusra) ក្រុមនេះគឺជាស្លាបប្រយុទ្ធផ្លូវការរបស់ក្រុមអាល់កៃដា នៅសស៊ីរី រហូតដល់ការផ្តាច់ទំនាក់ទំនងក្នុងឆ្នាំ២០១៦។ ក្រុម HTS នេះក៏ត្រូវបានដាក់ទណ្ឌកម្មដោយក្រុមប្រឹក្សាសន្តិសុខអង្គការសហប្រជាជាតិផងដែរ៕