ក្រុមឧទ្ទាម និងអ្នកឃ្លាំមើលសង្គ្រាម បាននិយាយថា ក្រុមឧទ្ទាមស៊ីរី បន្តវាយរុលទៅមុខប្រឆាំងនឹងកងកម្លាំងរដ្ឋាភិបាល នៅពីថ្ងៃអង្គារ (០៣ ធ្នូ) ដោយបានរុញច្រានយ៉ាងកៀកទៅកាន់ទីក្រុងហាម៉ា (Hama) ដ៏សំខាន់ ដែលនេះជាការបន្ថែមសម្ពាធកាន់តែខ្លាំងលើលោកប្រធានាធិបតី បាស្ហា អាល់-អាសាដ (Bashar al-Assad) សម្ព័ន្ធមិត្តរបស់ខ្ឡួន បន្ទាប់ពីការដណ្តើមកាន់កាប់ទីក្រុងអាឡិបប៉ូ (Aleppo) យ៉ាងលឿនកាលពីសប្តាហ៍មុន។

ក្រុមឧទ្ទាម និងក្រុមឃ្លាំមើលសង្រ្គាមសិទ្ធិមនុស្សស៊ីរី បាននិយាយថា ក្រុមបះបោរបានដណ្តើមយកភូមិនានា រួមទាំងភូមិ ម៉ាអា សាហួរ (Maar Shahur) ប៉ុន្មានគីឡូម៉ែត្រប៉ុណ្ណោះពីភាគខាងជើងនៃទីក្រុងហាម៉ា។ ប្រព័ន្ធផ្សព្វផ្សាយរដ្ឋស៊ីរីនិយាយថា កងកម្លាំងពង្រឹងកំពុងទៅដល់ក្នុងតំបន់ដើម្បីទប់ទល់។

ការវាយប្រហារលើក្រុងហាម៉ា នឹងបង្កើនសម្ពាធកាន់តែធំលើលោក Assad ដែលសម្ព័ន្ធមិត្តរុស្ស៊ី និងអ៊ីរ៉ង់របស់ខ្លួន បានព្យាយាមគាំទ្រលោកប្រឆាំងនឹងក្រុមបះបោរដែលកំពុងងើបឡើងវិញ។ ទីក្រុងនេះនៅតែស្ថិតក្នុងដៃរដ្ឋាភិបាល ចាប់តាំងពីសង្គ្រាមស៊ីវិលបានផ្ទុះឡើងក្នុងឆ្នាំ២០១១ មក។

កំណើនជានិរន្តរភាពនៃការប្រយុទ្ធណាមួយនៅស៊ីរី ប្រថុយនឹងការរុញច្រានតំបន់ឱ្យធ្លាក់ក្នុងអស្ថិរភាពកាន់តែខ្លាំង បន្ថែមពីលើសង្គ្រាមនៅដែនដីហ្កាហ្សា និងលីបង់។ ការដកថយដោយកងកម្លាំងរបស់លោក Assad ក្នុងពេលប៉ុន្មានថ្ងៃកន្លងមក បានជំរុញឱ្យក្រុមឧទ្ទាមជាច្រើនប្រឹងប្រែងដណ្ដើមការគ្រប់គ្រងនៅភាគពាយព្យ ខាងជើង និងខាងកើតរបស់ប្រទេស៕