ឆ្មាំសមុទ្រហ្វីលីពីន និងចិន បានរាយការណ៍អំពីការប្រឈមមុខដាក់គ្នាជាថ្មីជុំវិញដែនទឹកជម្លោះនៅក្នុងសមុទ្រចិនខាងត្បូងនៅថ្ងៃពុធ (០៤ ធ្នូ) នេះ ដែលជាការប៉ះទង្គិចចុងក្រោយបង្អស់នៅក្នុងជម្លោះដ៏រ៉ាំរ៉ៃរវាងប្រទេសជិតខាងទាំងពីរ។

ឆ្មាំល្បាតឆ្នេររបស់ចិន និយាយថា នាវាហ្វីលីពីន ៤គ្រឿង បានព្យាយាមចូលទៅក្នុងដែនទឹករបស់ចិននៅជុំវិញថ្មប៉ប្រះទឹក ស្កាបូរ៉ូ ស្ហូល (Scarborough Shoal) ក្នុងសមុទ្រចិនខាងត្បូង ប៉ុន្តែឆ្មាំល្បាតឆ្នេរហ្វីលីពីន (PCG) បាននិយាយថា កងនាវាចរ និងនាវាឆ្មាំល្បាតឆ្នេររបស់ប្រទេសចិន បានចាត់វិធានការយ៉ាងកម្រោលប្រឆាំងនឹងការល្បាតជាប្រចាំរបស់ទីក្រុងម៉ានីល និងការិយាល័យជលផលនៅជិតដែនទឹកជម្លោះនេះ។

លោក ជេ តារៀលឡា (Jay Tarriela) អ្នកនាំពាក្យឆ្មាំល្បាតឆ្នេរហ្វីលីពីន PCG ប្រចាំសមុទ្រចិនខាងត្បូង បាននិយាយនៅក្នុងសេចក្តីថ្លែងការណ៍មួយថា ឆ្មាំល្បាតឆ្នេរចិន បានប្រើកាណុងបាញ់ទឹកទៅកាន់នាវាហ្វីលីពីន "តម្រង់ចំអង់តែននាវាចរណ៍របស់នាវា" ហើយនាវាហ្វីលីពីនក៏ប្រឈមនឹង "ការរារាំង ឃ្លាំមើល និងការបើកបរដ៏គ្រោះថ្នាក់" ពីនាវាកងទ័ពជើងទឹក និងនាវាឆ្មាំល្បាតឆ្នេររបស់ចិនផងដែរ។

ឧបទ្ទវហេតុនេះកើតឡើងបន្ទាប់ពីមានជម្លោះការទូតនៅក្នុងខែវិច្ឆិកា ក្នុងពេលដែលចិនបានគូសបន្ទាត់មូលដ្ឋាន "ដែនទឹក" ជុំវិញថ្មប៉ប្រះទឹកនេះ ដែលទីក្រុងប៉េកាំង ហៅថាកោះ ហ័ងយាន (Huangyan)។ ភាពតានតឹងរវាងចិន និងហ្វីលីពីនជុំវិញសមុទ្រចិនខាងត្បូង បានកើនឡើងពេញមួយឆ្នាំនេះ ជាពិសេសនៅលើដែនទឹក Scarborough Shoal ដែលជាកន្លែងនេសាទដ៏សំខាន់៕