ប្រធានផ្នែកឧតុនិយមរបស់ប្រតិបត្តិករបណ្តាញអគ្គិសនី បាននិយាយកាលពីថ្ងៃអង្គារ (០៣ ធ្នូ) ថា រដូវរងានេះត្រូវបានគេព្យាករថានឹងនាំមកនូវភាពត្រជាក់ខ្លាំងភ្លាមៗទៅកាន់រដ្ឋតិចសាស់ របស់សហរដ្ឋអាមេរិក ដែលអាចប៉ះពាល់ដល់បណ្តាញអគ្គិសនីរបស់រដ្ឋនៅដើមឆ្នាំ២០២៥ ដោយរំលឹកឡើងវិញពីឥទ្ធិពលនៃព្យុះ អ៊ូរី (Uri) កាលពីបួនឆ្នាំមុន។

លោក គ្រីស ខូលេមែន (Chris Coleman) ប្រធានឧតុនិយមនៅក្រុមប្រឹក្សាថាមពលអគ្គិសនីនៃរដ្ឋតិចសាស់ បាននិយាយក្នុងអំឡុងពេលកិច្ចប្រជុំក្រុមប្រឹក្សាភិបាលមួយថា "យើងស្ថិតនៅក្នុងគំរូអាកាសធាតុដែលដូចជាព្យុះ Uri លើកមុន ក្នុងរដូវរងារឆ្នាំនេះ"។

គួររម្លឹកថា ព្យុះ Uri បណ្តាលឱ្យដាច់អគ្គិសនីដល់លំនៅឋាន និងអាជីវកម្មរាប់លានកន្លែងក្នុងរដ្ឋតិចសាស់ ហើយបានបណ្ដាលឱ្យមនុស្សស្លាប់ជាង ២៤០នាក់។ វិបត្តិថាមពលពេលនោះក៏បានជំរុញឱ្យរដ្ឋតិចសាស់ ចាប់ផ្តើមជួសជុលបណ្តាញអគ្គិសនីរបស់ខ្លួន ដើម្បីបង្កើនភាពជឿជាក់។

លោក Coleman បានលើកពីកត្តាជាច្រើន រួមទាំងគំរូមហាសមុទ្រ និងលំនាំបរិយាកាស ដែលចង្អុលទៅរកអាកាសធាតុរដូវរងាស្រដៀងនឹងដើមឆ្នាំ២០២១។ នៅពេលដែលអាកាសធាតុរដូវរងាកាន់តែធ្ងន់ធ្ងរ តម្រូវការអគ្គិសនីរបស់រដ្ឋតិចសាស់ ក៏កើនឡើងដែរ។ នៅអំឡុងរដូវរងារកាលថ្ងៃទី១៦ ខែមករា ឆ្នាំនេះ រដ្ឋតិចសាស់ បានមើលឃើញកំណើនតម្រូវការថាមពលដ៏ធំបំផុតរបស់ខ្លួន ជាមួយនឹងកម្រិតខ្ពស់បំផុតនៃការប្រើប្រាស់ជាង ៧៨.៤០០មេហ្គាវ៉ាត់៕