ប្រមុខសម្ព័ន្ធយោធាណាតូ លោក Mark Rutte បាននិយាយកាលពីថ្ងៃអង្គារថា សម្ព័ន្ធយោធាណាតូ នឹងបង្កើនការចែករំលែកព័ត៌មានសម្ងាត់ និងធ្វើឱ្យប្រសើរឡើងនូវការការពារហេដ្ឋារចនាសម្ព័ន្ធសំខាន់ៗ ក្នុងការប្រឈមមុខទៅនឹងសកម្មភាព «អរិភាព» នៃការបំផ្លិចបំផ្លាញទៅលើសម្ព័ន្ធមិត្ត ធ្វើឡើងដោយរុស្ស៊ី និងចិន។

លោក Rutte បាននិយាយទៅកាន់អ្នកសារព័ត៌មានថា «ក្នុងរយៈពេលប៉ុន្មានឆ្នាំកន្លងទៅនេះ រុស្ស៊ី និងចិន បានព្យាយាមបង្កអស្ថិរភាពដល់ប្រទេសជាតិរបស់យើងដោយសកម្មភាពនៃការបំផ្លិចបំផ្លាញ ការវាយប្រហារតាមអ៊ីនធឺណិត ការផ្សព្វផ្សាយព័ត៌មានមិនពិត និងការគំរាមកំហែងផ្នែកថាមពលដើម្បីបំភិតបំភ័យយើង»។

លោកនិយាយថា «សម្ព័ន្ធមិត្តណាតូ នឹងបន្តឈររួមគ្នាដើម្បីប្រឈមមុខទៅនឹងការគំរាមកំហែងទាំងនេះ តាមរយៈវិធានការនានា រួមទាំងការចែករំលែកព័ត៌មានសម្ងាត់កាន់តែទូលំទូលាយ និងការការពារកាន់តែប្រសើរនូវហេដ្ឋារចនាសម្ព័ន្ធសំខាន់ៗ»។

រដ្ឋមន្ត្រីការបរទេសណាតូ ដែលបានមកជួបប្រជុំគ្នានៅទីក្រុងប្រ៊ុចសែល ប្រទេសបែលហ្ស៊ិក ក្នុងសប្តាហ៍នេះ ត្រូវបានគេរំពឹងថានឹងបង្កើតយុទ្ធសាស្ត្រថ្មីដើម្បីទប់ទល់នឹងការគំរាមកំហែងខ្លាំង ដែលគ្របដណ្តប់លើការឃោសនា ការជ្រៀតជ្រែកផ្នែកនយោបាយ ការបំផ្លិចបំផ្លាញហេដ្ឋារចនាសម្ព័ន្ធសំខាន់ៗ និងតាកទិកផ្សេងទៀត ហួសពីដែនយោធាធម្មតា។