ខណៈរដ្ឋបាលដែលនឹងចូលកាន់តំណែងនៅពេលខាងមុខរបស់លោក Donald Trump មានផែនការដាក់វិធានការតឹងរ៉ឹងសម្រាប់ព្រំដែនភាគខាងត្បូងរបស់សហរដ្ឋអាមេរិក ជនអន្តោប្រវេសន៍ដែលកំពុងរង់ចាំនៅប្រទេសម៉ិកស៊ិកសម្រាប់ការណាត់ជួបដើម្បីស្វែងរកសិទ្ធិជ្រកកោន បានប្រឈមទៅនឹងការសម្រេចចិត្តដ៏លំបាក ជុំវិញថាតើពួកគេនឹងបន្តឆ្ពោះទៅមុខដើម្បីចូលទៅកាន់សហរដ្ឋអាមេរិកបន្ទាប់ពី លោក Trump ចូលកាន់តំណែង? ឬថាតើ ពួកគេត្រូវត្រឡប់ទៅកាន់កន្លែងដែលពួកគេអស់សង្ឃឹមក្នុងការចាកចេញ?។

ជនអន្តោប្រវេសន៍ម្នាក់ នាង Yuleidi Moreno ដែលបានធ្វើដំណើរទៅកាន់ប្រទេសម៉ិកស៊ិក ពីប្រទេសវេណេស៊ុយអេឡា បានប្រាប់សារព័ត៌មាន Reuters ថា វាប្រហែលជាមិនគួរនៅរង់ចាំនៅប្រទេសម៉ិកស៊ិក សម្រាប់ឱកាសនៃជីវិតដ៏ប្រសើរនៅសហរដ្ឋអាមេរិកទេ «ខ្ញុំយំជារៀងរាល់ថ្ងៃ ខ្ញុំចង់ត្រឡប់ទៅប្រទេសរបស់ខ្ញុំវិញ ខ្ញុំមិនចង់ស្នាក់នៅទីនេះទៀតទេ ខ្ញុំរងទុក្ខច្រើនហើយ ហើយបុរសប្រព្រឹត្តអាក្រក់មកលើយើង។ ពេលខ្លះមនុស្សបានស្លាប់ មានការចាប់រំលោភ ស្ត្រីត្រូវគេធ្វើបាប នេះគឺជារឿងដ៏រន្ធត់»។

អំពើហិង្សានៅប្រទេសម៉ិកស៊ិកមានទម្ងន់ធ្ងន់ទៅលើការសម្រេចចិត្តណាមួយ។ ឧក្រិដ្ឋកម្មរៀបចំទុក បានបង្កើតបណ្តាញជួញដូរមនុស្សយ៉ាងទូលំទូលាយនៅទូទាំងប្រទេសម៉ិកស៊ិក ដែលធ្វើឱ្យការធ្វើដំណើរទៅភាគខាងជើងឆ្លងកាត់ប្រទេសនេះ ជួបគ្រោះថ្នាក់ច្រើន។

មន្ត្រីប្រទេសវេណេស៊ុយអេឡាម្នាក់ បាននិយាយថា ប្រជាជនរបស់ខ្លួន ចន្លោះពី ៥០ ទៅ ១០០នាក់ ស្នើសុំអ្វីដែលគេហៅថា «ការវិលត្រឡប់ទៅវិញដោយស្ម័គ្រចិត្ត» រៀងរាល់សប្តាហ៍ពីប្រទេសម៉ិកស៊ិក។

ប្រភពព័ត៌មានបានប្រាប់សារព័ត៌មានរ៉យទ័រថា លោក Trump ត្រូវបានគេរំពឹងថានឹងមានចំណាត់ការមួយចំនួននៅថ្ងៃដំបូងរបស់លោកក្នុងពេលចូលកាន់តំណែង ដែលនឹងផ្តល់អំណាចបន្ថែមដល់មន្រ្តីអន្តោប្រវេសន៍សហព័ន្ធក្នុងចាប់ខ្លួនអ្នកទាំងឡាយណាដែលពុំមានប្រវត្តិប្រព្រឹត្តអំពើឧក្រិដ្ឋកម្ម និងបង្កើនកងទ័ពទៅកាន់ព្រំដែនសហរដ្ឋអាមេរិក- ម៉ិកស៊ិក។