អង្គការសហប្រជាជាតិ (UN) កំពុងស្វែងរជំនួយចំនួន ៤៧ពាន់លានដុល្លារ សម្រាប់ឆ្នាំ២០២៥ ដើម្បីជួយមនុស្សរាប់លាននាក់ដែលភៀសខ្លួនចេញពីជម្លោះ និងប្រយុទ្ធប្រឆាំងនឹងភាពអត់ឃ្លាន នៅពេលដែលការអំពាវនាវ នៅឆ្នាំនេះ មិនទទួលបានថវិកាសូម្បីតែពាក់កណ្តាល ហើយមន្ត្រីជំនួយបារម្ភពីកាត់បន្ថយពីបណ្ដារដ្ឋលោកខាងលិច ក្នុងនោះរួមទាំងពីម្ចាស់ជំនួយធំជាងគេបំផុត គឺសហរដ្ឋអាមេរិក ក្រោមការដឹកនាំរបស់ប្រធានាធិបតីជាប់ឆ្នោត លោក Donald Trump ។

ការិយាល័យ UN សម្រាប់ការសម្របសម្រួលកិច្ចការមនុស្សធម៌ (OCHA) សង្ឃឹមថា ជំនួយនឹងបានទៅដល់មនុស្សប្រហែល ១៩០លាននាក់ នៅក្នុងប្រទេសចំនួន៣២ នាឆ្នាំក្រោយ ក្នុងនោះរួមទាំងប្រទេសស៊ូដង់ ស៊ីរី តំបន់ហ្កាហ្សា និងប្រទេសអ៊ុយក្រែន ដែលសុទ្ធតែជាប្រទេស និងតំបន់ កំពុងត្រូវបានហែកហួរដោយសង្រ្គាម។

UN បានប៉ាន់ប្រមាណថា មនុស្ស ៣០៥លាននាក់ កំពុងត្រូវការជំនួយមនុស្សធម៌ នៅលើពិភពលោក ប៉ុន្តែការអំពាវនាវនេះ បានធ្វើឲ្យមនុស្សប្រហែល ១១៥លាននាក់ មិនអាចសង្ឃឹមទទួលបានមូលនិធិនោះទេ ដោយផ្នែកលើតថភាពជាក់ស្ដែង។

បើយោងតាមទិន្នន័យរបស់ UN បានបង្ហាញថា ការអំពាវនាវរបស់ទីភ្នាក់ងារជំនួយមនុស្សធម៌របស់ UN គឺជាការអំពាវនាវកញ្ចប់ជំនួយដ៏ធំបំផុតទី៤ ក្នុងប្រវត្តិសាស្ត្រ ដោយចំនួនធំបំផុត គឺ ៥៦ពាន់លានដុល្លារ ក្នុងឆ្នាំ២០២៣៕