រុស្ស៊ី បានឲ្យដឹងនៅថ្ងៃពុធនេះថា ពុំទាន់មានហេតុផលគ្រប់គ្រាន់ ដើម្បីចរចាអំពីវិធីធ្វើឲ្យសង្រ្គាម នៅអ៊ុយក្រែនត្រូវបញ្ចប់នៅឡើយទេ ជាការអត្ថាធិប្បាយអំពីកិច្ចចរចាសន្តិភាពដែលត្រូវធ្វើឡើងកាន់តែញយដងជាងមុន គិតចាប់តាំងពីលោក Donald Trump បានឈ្នះការបោះឆ្នោតប្រធានាធិបតីសហរដ្ឋអាមេរិក ក្នុងខែវិច្ឆិកា។

ដោយបញ្ជាក់ឡើងវិញពីជំហរដ៏យូរអង្វែងរបស់ទីក្រុងមូស្គូលើកិច្ចចរចានេះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់សារព័ត៌មាន Izvestia ថា៖ «មិនទាន់មានហេតុផល សម្រាប់ការចរចា នៅឡើយទេ។ ប្រទេសជាច្រើន បានប្រកាសពីការត្រៀមខ្លួន ក្នុងការផ្តល់ដែនដីរបស់ពួកគេ សម្រាប់ការពិភាក្សា ហើយយើងអរគុណ ចំពោះប្រទេសទាំងអស់ ចំពោះការមានសុច្ឆន្ទៈបែបនេះ ក្នុងនោះរួមទាំងប្រទេសកាតាផងដែរ»។

គួរបញ្ជាក់ថា ប្រទេសកាតា បានសម្រុះសម្រួលឲ្យមានការបញ្ជូនត្រឡប់មកវិញនូវកុមារអ៊ុយក្រែនជាច្រើនដែលត្រូវបាននាំយកទៅប្រទេសរុស្ស៊ីពីតំបន់ជម្លោះ គិតចាប់តាំងពីការចាប់ផ្តើមនៃសង្រ្គាម។ ជនស៊ីវិលរាប់ពាន់នាក់ ដែលភាគច្រើនជាជនជាតិអ៊ុយក្រែន ត្រូវបានសម្លាប់ ចាប់តាំងពីរុស្ស៊ីបានបើកការលុកលុយពេញលេញលើប្រទេសនេះ ក្នុងខែកុម្ភៈ ឆ្នាំ២០២២។

លោកស្រី Valentina Matviyenko ប្រធានក្រុមប្រឹក្សាសហព័ន្ធ ដែលជាសភាជាន់ខ្ពស់របស់រុស្ស៊ី បាននិយាយកាលពីថ្ងៃចន្ទថា អាចនឹងមានកិច្ចប្រឹងប្រែង ដើម្បីចាប់ផ្តើមកិច្ចចរចាសន្តិភាព ជាមួយអ៊ុយក្រែន នៅឆ្នាំ២០២៥។

កាលពីចុងខែវិច្ឆិកា ប្រភពបានប្រាប់សារព័ត៌មានរ៉យទ័រថា ប្រធានាធិបតីរុស្ស៊ីលោក Vladimir Putin បើកចំហរ ក្នុងការពិភាក្សាអំពីកិច្ចព្រមព្រៀងបទឈប់បាញ់ នៅអ៊ុយក្រែន ជាមួយលោក Trump ហើយអាចយល់ព្រមក្នុងការបញ្ចប់ជម្លោះ នៅសមរភូមិជួរមុខ៕