ប្រភពអេហ្ស៊ីបមួយ បាននិយាយកាលពីថ្ងៃអង្គារថា គណៈប្រតិភូមកពីចលនា Fatah នៃអាជ្ញាធរប៉ាឡេស្ទីន (PA) និងចលនាប្រដាប់អាវុធហាម៉ាស( Hamas) បានព្រមព្រៀងលើឯកសារព្រាងមួយ ដើម្បីបង្កើតគណៈកម្មាធិការរួមមួយ សម្រាប់គ្រប់គ្រងតំបន់ហ្កាហ្សាស្ទ្រីបក្រោយសង្រ្គាម។ 

ប្រភពព័ត៌មាន  អេហ្ស៊ីបដែលដឹងច្បាស់អំពីបញ្ហានេះ បានប្រាប់សារព័ត៌មានស៊ីនហួ ក្នុងលក្ខខណ្ឌអនាមិកថា ឯកសារដែលមានពីរទំព័រចែងថា គណៈកម្មាធិការគ្រប់គ្រងបញ្ហាតំបន់ហ្កាហ្សាក្នុងវិស័យរួមមានការអប់រំ សុខភាព សេដ្ឋកិច្ច ជំនួយមនុស្សធម៌ និងការកសាងឡើងវិញនឹងមានឥស្សរជនប៉ាឡេស្ទីនឯករាជ្យពី ១០ ទៅ ១៥រូប ដែលគេស្គាល់ច្បាស់ថា មាន«សមត្ថភាព សុចរិតភាព បទពិសោធ និងតម្លា   ភាព។ ប្រភពនោះ បានបន្ថែមថា គណៈកម្មាធិការនេះ នឹងត្រូវគ្រប់គ្រងដោយអាជ្ញាធរប៉ាឡេស្ទីន( PA)។

កិច្ចព្រមព្រៀងស្តីពីសេចក្តីព្រាងឯកសារដែលមិនទាន់ត្រូវបានអនុម័តដោយប្រធានអាជ្ញាធរ ប៉ាឡេស្ទីនលោក ម៉ាខ្មូដ អាបាស( Mahmoud Abbas) ត្រូវបានសម្រេច បន្ទាប់ពីកិច្ចចរចានាពេលថ្មីៗនេះ រវាង ចលនា Fatah និងក្រុមហាម៉ាស នៅទីក្រុងគែរ ប្រទេសអេហ្ស៊ីប ដែលបានចាប់ផ្តើមកាលពីថ្ងៃសៅរ៍។

ប្រភពនោះ បានប្រាប់ស៊ីនហួថា គោលការណ៍នៃការបង្កើតគណៈកម្មាធិការមួយ បញ្ជាក់ថា៖«គណៈកម្មាធិការនេះ នឹងត្រូវស្ថិតនៅក្រោមប្រព័ន្ធនយោបាយប៉ាឡេស្ទីន នៅតំបន់វេសបែង, ហ្កាហ្សា, និងទីក្រុងហ្ស៊េរុយសាឡឹម ហើយការបង្កើតគណៈកម្មាធិការនេះ នឹងមិននាំទៅដល់ការបំបែកតំបន់ហ្កាហ្សា ពីទឹកដីប៉ាឡេស្ទីនទាំងមូលនោះទេ»។