អង្គការសហប្រជាជាតិកាលពីថ្ងៃអង្គារ បានថ្កោលទោសការបាញ់ផ្លោងទៅលើជំរំភៀសខ្លួន នៅតំបន់ North Darfur ដោយកងកម្លាំងគាំទ្ររហ័សរបស់ស៊ូដង់ (RSF) ដែលបានសម្លាប់មនុស្សយ៉ាងហោចណាស់ ៦នាក់។

ជំរំ Zamzam ដែលញាំញីដោយគ្រោះទុរ្ភិក្ស ស្ថិតនៅភាគខាងត្បូងនៃរដ្ឋធានីរដ្ឋ El-Fasher បានរងការវាយប្រហារដោយគ្រាប់រ៉ូកែតនិងកាំភ្លើងធំ ដោយកងកម្លាំង RSF កាលពីថ្ងៃអាទិត្យ។

អ្នកសម្របសម្រួលក្នុងតំបន់របស់UN ប្រចាំប្រទេសស៊ូដង់ អ្នកស្រី Clementine Nkweta-Salami បាននិយាយនៅក្នុងសេចក្តីថ្លែងការណ៍មួយថា៖«អង្គការសហប្រជាជាតិ និងដៃគូមនុស្សធម៌នៅស៊ូដង់ ថ្កោលទោសយ៉ាងដាច់អហង្ការចំពោះអំពើហិង្សាទាំងនេះ លើជនស៊ីវិលស្លូតត្រង់»។

អ្នកស្រី បានបន្ថែមថា៖ «ខ្ញុំមានការព្រួយបារម្ភយ៉ាងខ្លាំងចំពោះរបាយការណ៍នៃការបាញ់ផ្លោងមិនរើសមុខលើជំរំ Zamzam គ្លីនិកសុខភាព និងជម្រកជនភៀសខ្លួន។ ការការពាររបស់ពួកគេ គឺពិតជាសំខាន់បំផុត»។

ចាប់តាំងពីខែមេសា ឆ្នាំ ២០២៣ សង្គ្រាមរវាងកងទ័ពធម្មតា និងកងកម្លាំង RSF បានសម្លាប់មនុស្សរាប់ម៉ឺននាក់ ជម្លៀសខ្លួនជាង ១១លាននាក់ និងបានបង្កើតនូវអ្វីដែលអង្គការសហប្រជាជាតិហៅថា វិបត្តិមនុស្សធម៌ដ៏អាក្រក់បំផុត នៅក្នុងព្រឹត្តិការណ៍រំលឹកនាពេលថ្មីៗនេះ។