ប្រភពចំនួនបួនដែលដឹងចារកម្មសម្ងាត់របស់អាមេរិក បានធ្វើបច្ចុប្បន្នភាពប្រាប់សារព័ត៌មានរ៉យទ័រថា ក្រុមហេសបូឡា របស់លីបង់ បានរងការបំផ្លាញផ្នែកយោធាយ៉ាងខ្លាំងក្លាពីអ៊ីស្រាអែល ប៉ុន្តែក្រុមដែលគាំទ្រដោយអ៊ីរ៉ង់មួយនេះទំនងជានឹងព្យាយាមកសាងឃ្លាំងស្តុក និងកងកម្លាំងរបស់ខ្លួនឡើងវិញ ហើយបន្តបង្កការគំរាមកំហែងរយៈពេលវែងដល់សហរដ្ឋអាមេរិក និងសម្ព័ន្ធមិត្តក្នុងតំបន់របស់ខ្លួន។

ប្រភពដែលសុំមិនបញ្ចេញឈ្មោះទាំងនោះបានប្រាប់ថា បណ្ដាទីភ្នាក់ងារចារកម្មអាមេរិក បានវាយតម្លៃក្នុងប៉ុន្មានសប្តាហ៍ថ្មីៗនេះថា ទោះបីជាកំពុងទប់ទល់នឹងយុទ្ធនាការយោធារបស់អ៊ីស្រាអែលក៏ដោយ ក្រុមហេសបូឡា បានចាប់ផ្តើមជ្រើសរើសអ្នកប្រយុទ្ធថ្មី ហើយកំពុងព្យាយាមស្វែងរកមធ្យោបាយដើម្បីស្តារសមត្ថភាពឡើងវិញ តាមរយៈការផលិតក្នុងស្រុក និងការរត់ពន្ធសម្ភារៈឆ្លងកាត់ស៊ីរី។

ប្រភពបន្តថា គេមិនច្បាស់ទេថា កិច្ចខិតខំប្រឹងប្រែងទាំងនោះបានថយចុះកម្រិតណាឡើយ ចាប់តាំងពីសប្តាហ៍មុន នៅពេលដែលក្រុមហេសបូឡា និងអ៊ីស្រាអែល ឈានដល់បទឈប់បាញ់ដ៏ផុយស្រួយ។ គួរបញ្ជាក់ថា កិច្ចព្រមព្រៀងនេះហាមឃាត់ជាពិសេសចំពោះក្រុមហេសបូឡា ក្នុងការទិញអាវុធ ឬគ្រឿងបន្លាស់អាវុធ។

ក្នុងប៉ុន្មានថ្ងៃថ្មីៗនេះ អ៊ីស្រាអែលបានព្យាយាមកាត់បន្ថយសមត្ថភាពរបស់ហេសបូឡា ក្នុងការកសាងកងកម្លាំងយោធារបស់ខ្លួនឡើងវិញ ដោយវាយប្រហារលើជើងទម្របាញ់រ៉ូកែតរបស់ក្រុមនេះជាច្រើនគ្រឿងនៅលីបង់ ដោយទម្លាក់គ្រាប់បែកលើច្រកព្រំដែនជាមួយស៊ីរី និងរារាំងយន្តហោះអ៊ីរ៉ង់មួយគ្រឿងដែលសង្ស័យថាបានបញ្ចូនអាវុធឱ្យក្រុមសកម្មប្រយុទ្ធលីបង់មួយនេះ៕