ស៊ីហ្គេម៖ គិតត្រឹមថ្ងៃទី២៧ ខែតុលា ឆ្នាំ២០២១ នេះដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជានៅសល់ពេលតែ ៥៥៥ថ្ងៃទៀតប៉ុណ្ណោះ ស្របពេលថ្នាក់ដឹកនាំគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានអំពាវនាវឲ្យគណៈកម្មការជំនាញ និងសហព័ន្ធកីឡាជាតិចូលរួមរាប់ថយក្រោយ និងសម្រួចការងាររៀងៗខ្លួនដើម្បីឆ្ពោះទៅរកភាពជោគជ័យក្នុងព្រឹត្តិការណ៍ជាប្រវត្តិសាស្ដ្រនេះ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានបញ្ជាក់ថា នេះគឺជាពេលវេលាមួយដ៏សំខាន់ក្នុងការដាស់ស្មារតី អ្នកជំនាញទាំងអស់ត្រូវពង្រឹងផែនការយុទ្ធសាស្ដ្ររបស់ខ្លួន ព្រោះពេលវេលាកាន់តែខិតជិតដល់ ពិសេសសម្រាប់រយៈពេល ៥៥៥ថ្ងៃនៅសល់ គ្រប់ភាគីពាក់ព័ន្ធត្រូវចូលរួមរាប់ថយក្រោយទាំងអស់គ្នា ហើយសួរថា តើយើងធ្វើបានអ្វីខ្លះហើយ? ទទួលបានលទ្ធផលអ្វីខ្លះហើយ? និងមានអ្វីខ្វះខាតដែលត្រូវបំពេញបន្ថែមខ្លះ? គួរបញ្ជាក់ថា ព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ នៅកម្ពុជាត្រូវបានរាជរដ្ឋាភិបាល ក្រោមការចង្អុលបង្ហាញរបស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាសម្រេចកំណត់ថ្ងៃទី០៥ ខែឧសភា ឆ្នាំ២០២៣ គឺជាថ្ងៃបើកមហាព្រឹត្ដិការណ៍ជាប្រវត្តិសាស្ដ្រនេះ ខណៈពិធីបិទ នឹងធ្វើឡើងនៅថ្ងៃទី១៧ ខែដដែល។ បន្ទាប់ពីចប់ការប្រកួតកីឡាស៊ីហ្គេម កម្ពុជានឹងបន្ដធ្វើម្ចាស់ផ្ទះព្រឹត្តិការណ៍កីឡាជនពិការដ៏ធំមួយទៀត គឺការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០១ ដល់ថ្ងៃទី១០ ខែមិថុនា ឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
