ស្ថានទូតអាមេរិក ប្រចាំនៅទីក្រុងហាណូយ បានឲ្យដឹងនៅថ្ងៃព្រហស្បតិ៍នេះថា សហរដ្ឋអាមេរិកនឹងផ្តល់ប្រាក់ចំនួន ១២,៥លានដុល្លារដល់ប្រទេសវៀតណាម ដើម្បីលើកកម្ពស់សមត្ថភាពអនុវត្តច្បាប់ដែនសមុទ្ររបស់ប្រទេសនេះ និងប្រយុទ្ធប្រឆាំងនឹងការនេសាទខុសច្បាប់។

ស្ថានទូត បានប្រាប់ថា កញ្ចប់ជំនួយនេះ រួមមានការគាំទ្រដល់ភ្នាក់ងារអនុវត្តច្បាប់ដែនសមុទ្រវៀតណាម ការផ្ដល់ឲ្យនូវទូកខ្នាតតូចៗ និងការអភិវឌ្ឍកន្លែងហ្វឹកហាត់។

គួរបញ្ជាក់ថា ប្រទេសជិតខាង និងដៃគូពាណិជ្ជកម្មរបស់វៀតណាម បានជំរុញប្រទេសនេះអស់រយៈពេលជាច្រើនឆ្នាំមកហើយ ដើម្បីឲ្យចាត់វិធានការកាន់តែខ្លាំងឡើងៗប្រឆាំងនឹងការនេសាទខុសច្បាប់ ក្នុងនោះរួមទាំងការធ្វើបែបនោះដោយនាវាវៀតណាមនៅក្នុងដែនទឹកនៃប្រទេសជិតខាងផងដែរ។

សហភាពអ៊ឺរ៉ុប (EU) បានគំរាមកំហែងហាមឃាត់ជាយូរមកហើយមិនឲ្យមានការនាំចូលត្រីពីវៀតណាម ប្រសិនបើគ្មានការវិវត្តន៍ទៅមុខដោយជាក់ស្តែងណាមួយត្រូវសម្រេចបាន ដើម្បីទប់ស្កាត់ការនេសាទខុសច្បាប់។ បម្រាមនោះបានជះឥទ្ធិពលយ៉ាងខ្លាំងក្លា ក្នុងការកាត់បន្ថយបរិមាណនាំចេញត្រីរបស់វៀតណាមទៅកាន់ EU ដែលជាទីផ្សារធំបំផុតមួយរបស់ខ្លួន។

ហើយលើសពីនោះទៀត ប្រទេសតំបន់អាស៊ីអាគ្នេយ៍មួយនេះ ក៏តែងតែប៉ះទង្គិចជាមួយប្រទេសចិន ជុំវិញព្រំដែនក្នុងសមុទ្រចិនខាងត្បូង ដោយជម្លោះមានពាក់ព័ន្ធនឹងនាវាឆ្មាំល្បាតឆ្នេរ អ្នកនេសាទ និងនាវាអនុវត្តច្បាប់ផ្សេងទៀតមកពីភាគីទាំងសងខាង៕