សិស្សនិស្សិតចំនួន ១៩១៧នាក់(ស្រី ២៥៨នាក់) ដែល​សិក្សា​នៅ​វិទ្យាស្ថានជាតិ​ពហុ​បច្ចេកទេស​កម្ពុជា (NPIC)នៃក្រសួងការងារ និងបណ្ដុះបណ្ដាលវិជ្ជាជីវៈ បាន​ប្រឡង​បញ្ច​ប់​ការ​សិក្សា​ឆ្នាំ​២០២៤ ខណៈពួកគេបានបង្ហាញពីសុទិដ្ឋិនិយមនៃលទ្ធផលដែល​បានពីការខិតខំ​ប្រឹងប្រែង​របស់​ពួកគេក្នុងការសិក្សារៀនសូត្រជំនាញ និងបច្ចេកទេសកន្លងមក។

របាយការណ៍របស់ NPIC បានឱ្យដឹងថា ការប្រឡងប​ញ្ចប់​ការ​សិក្សា​ឆ្នាំ​២០២៤​នេះ​មាន​រយៈ​ពេល​ ៥ថ្ងៃចាប់ពីថ្ងៃទី ៣ ដល់ថ្ងៃទី ៧ ខែធ្នូ គឺជាការប្រឡងលើកទី១ សម្រាប់​ការ​ការពារ​និក្ខេបនទ​បញ្ចប់ការសិក្សាថ្នាក់បណ្ឌិតបច្ចេកវិទ្យា ហើយនេះជាលើកទី៤ សម្រាប់ការ​ការពារ​សារណា​បញ្ចប់ការសិក្សាថ្នាក់បរិញ្ញាបត្រជាន់ខ្ពស់បច្ចេកទេស។

ចំណែកការប្រឡងនេះទៀតសោធ គឺជាលើកទី១៦ សម្រាប់ការការពារ​សារណា​បញ្ចប់​ការ​សិក្សា​កម្រិត​បរិញ្ញាបត្របច្ចេកទេស ហើយវាជាលើកទី១៨ សម្រាប់ការប្រឡង​បញ្ចប់​ការ​សិក្សា​កម្រិត​សញ្ញាបត្រ​ជាន់​ខ្ពស់បច្ចេកទេស និងជាលើកទី៨ សម្រាប់ការប្រឡងបញ្ចប់ការ​សិក្សា​កម្រិត​សញ្ញា​បត្រ​បច្ចេកទេស និងវិជ្ជាជីវៈ២ និង៣។

NPIC បានបន្តថា និស្សិតកម្រិតបណ្ឌិតបច្ចេកវិទ្យា (PhD Level) មានចំនួន ១៨នាក់ (ស្រី១​នាក់​) ចែកជា២ជំនាញគឺ ជំនាញវិស្វកម្មអគ្គិសនីចំនួន ១៥នាក់ (ស្រី១នាក់) និង​ជំនាញ​វិស្វកម្មសំណង់ស៊ីវិលចំនួន ៣នាក់ (ស្រី០នាក់)។ និស្សិតកម្រិតបរិញ្ញាបត្រជាន់ខ្ពស់បច្ចេកទេស (Master Level)មានចំនួន ១០៨នាក់ (ស្រី៧នាក់) មានចែកជា ៤ជំនាញគឺ ជំនាញ​វិស្វកម្ម​អគ្គិសនី​ចំនួន ១៦នាក់ (ស្រី០នាក់), ជំនាញវិស្វកម្មសំណង់ស៊ីវិលចំនួន ៤៤នាក់ (ស្រី២នាក់), ជំនាញ​សំណង់ស្ថាបត្យកម្មចំនួន ២៧នាក់ (ស្រី៤នាក់) និងជំនាញវិស្វកម្មមេកានិកចំនួន ២១​នាក់ (ស្រី១នាក់)។

ចំណែកនិស្សិតកម្រិតបរិញ្ញាបត្របច្ចេកទេស (Engineering Level) មានចំនួន ១០៨៣នាក់ (ស្រី១១៦នាក់) ដែលចែកជា ១២ជំនាញ ហើយនិស្សិតកម្រិតសញ្ញាបត្រជាន់ខ្ពស់បច្ចេកទេស (Diploma Level)មានចំនួន ៥៦៤នាក់ដែលមាន ១២ជំនាញ និងសិស្ស​កម្រិត​សញ្ញា​បត្រ​បច្ចេក​ទេស និងវិជ្ញាជីវៈកម្រិត២ និង៣មានចំនួន ១៤០នាក់។

និស្សិតឈ្មោះ ចាន់ ប៉េងហ៊ុយ អាយុ ២០ឆ្នាំសិក្សា​ជំនាញ​អគ្គិសនី​ថ្នាក់​បរិញ្ញាបត្រ​រង​បាន​និយាយ​ថា រូបគេពិតជាសប្បាយរីករាយយ៉ាងខ្លាំងនៅក្នុងការប្រឡងបញ្ចប់ឆ្នាំសិក្សា២០២៤នេះ ដោយសារ​នេះ​ជាពេលវេលាដែលរូនគេបានទន្ទឹងរង់ចាំ ដើម្បីឆាប់បានចូល​ធ្វើ​ការងារ​ទៅ​តាម​មុខ​ជំនាញ​ដែល​ខ្លួនសិក្សារៀនសូត្រ។

លោកបន្តថា «ខ្ញុំសូមថ្លែងអំណរគុណដល់រាជរដ្ឋាភិបាលដែលដឹកនាំដោយសម្ដេចបវរធិបតី ហ៊ុន ម៉ាណែត ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ ក៏ដូចជា​លោក​គ្រូ អ្នកគ្រូសាលា NPIC ដែលបានផ្ដល់ឱកាសឱ្យខ្ញុំបានសិក្សាជំនាញដែលខ្ញុំពេញចិត្ត ហើយ​នឹង​ធ្វើ​ឱ្យ​ខ្ញុំ​មានជំនាញមួយយ៉ាងពិតប្រាកដក្នុងការជួយរកប្រាក់ចំណូលផ្គត់ផ្គងគ្រួសារខ្ញុំ»។

និស្សិត​ឈ្មោះ ម៉ាន់ វ៉ាន់នេត អាយុ ២៣ឆ្នាំ​សិក្សា​ជំនាញ​អគ្គិសនី​ថ្នាក់​បរិញ្ញាបត្រ​រង​បាន​និយាយ​ថា ឆ្លងការប្រឡងនាពេលនេះ លោកមានក្ដីសង្ឃឹមច្រើនថានឹងទទួលបានលទ្ធផលជាទីពេញចិត្ត ព្រោះ​លោកបានខិតខំប្រឹងប្រែងសិក្សារៀនសូត្រយ៉ាងខ្លាំង ថែមទាំង​មាន​ការ​ជួយ​ជ្រុំជ្រែក​ពី​លោក​គ្រូ អ្នកគ្រូផងដែរ។

លោកបន្តថា៖«ខ្ញុំសូមអំពាវនាវដល់យុវជនផ្សេងទៀតដែលមិនមានជំនាញ ហើយ​កំពុង​សម្រេច​ចិត្ត​ស្វែង​រការងារធ្វើ គឺគួរតែមករៀនជំនាញសិន ដើម្បីទទួលបានសមត្ថភាពពិតប្រាកដ ហើយ​មាន​ជំនាញ​បច្ចេកទេសស្របទៅតាមទីផ្សារការងារនាពេលបច្ចុប្បន្ននេះ ហើយអាចរក​ចំណូល​ជួយ​ដោះស្រាយជីវៈភាពគ្រួសារយើង»៕