លោកប្រធានាធិបតីបារាំង Emmanuel Macron បាននិយាយកាលពីថ្ងៃព្រហស្បតិ៍ (០៥ ធ្នូ) ក្រោយរដ្ឋាភិបាលបានដួលរលំថា លោកនឹងតែងតាំងនាយករដ្ឋមន្ត្រីថ្មីនៅប៉ុន្មានថ្ងៃខាងមុខនេះ បន្ទាប់ពីលោក មីស្ហែល បានីញ៉េ (Michel Barnier) បានលាលែងពីតំណែង ដែលធ្វើឱ្យលោកក្លាយជានាយករដ្ឋមន្ត្រីកាន់តំណែងរយៈពេលខ្លីបំផុតក្នុងប្រវត្តិសាស្ត្របារាំងសម័យទំនើប។

បេក្ខភាពលេចធ្លោជាច្រើនដែលគេមើលឃើញថាអាចទទួលតំណែងនាយករដ្ឋមន្រ្តីបន្ទាប់នោះមានដូចជា លោក សេបាទ្យែន លេក័រនុយ (Sébastien Lecornu) វ័យ ៣៨ឆ្នាំ ដែលថ្មីៗនេះបានបម្រើការជារដ្ឋមន្ត្រីការពារជាតិនៅក្នុងរដ្ឋាភិបាលលោក Barnier។

អ្នកទីពីរគឺលោក ហ្រ្វង់ស្វ័រ បាយរូ (François Bayrou) វ័យ ៧៣ឆ្នាំ អតីតយុទ្ធជនកណ្តាលនិយម ដែលបក្សចលនាប្រជាធិបតេយ្យ (MoDem) របស់លោកជាផ្នែកមួយនៃក្រុមចម្រុះកាន់អំណាចរបស់លោក Macron ចាប់តាំងពីឆ្នាំ២០១៧មក។

អ្នកបន្ទាប់គឺលោក ប៊ែកណា កាហ្សង់នើហ្វ (Bernard Cazeneuve) វ័យ ៦១ឆ្នាំ ដែលធ្លាប់បម្រើការជានាយករដ្ឋមន្ត្រីក្នុងអំឡុងពេលប៉ុន្មានខែចុងក្រោយនៃតំណែងប្រធានាធិបតីរបស់អ្នកនយោបាយសង្គមនិយម លោក ហ្រ្វង់ស្វ័រ ហូឡង់ (Francois Hollande)។ អ្នកទីបួនគឺលោក សាវីយ៉េ ប៊ែរត្រង (Xavier Bertrand) វ័យ ៥៩ឆ្នាំ អ្នកនយោបាយស្តាំនិយមកណ្តាល ដែលដឹកនាំតំបន់ភាគខាងជើង ជាទីដែលលោក Macron ស្វះស្វែងអភិវឌ្ឍប្រព័ន្ធអេកូជុំវិញអាគុយរថយន្តអគ្គិសនី។

អ្នកចុងក្រោយគឺលោក ហ្រ្វង់ស្វ័រ បារ័ង (Francois Baroin) វ័យ ៥៩ឆ្នាំ អ្នកនយោបាយអាជីពស្តាំនិយមកណ្តាល ដែលធ្លាប់បម្រើការជារដ្ឋមន្ត្រីក្រសួងហិរញ្ញវត្ថុមួយរយៈខ្លីនៅកម្រិតខ្ពស់នៃវិបត្តិបំណុលអធិបតេយ្យភាពរបស់អឺរ៉ុប ក្នុងឆ្នាំ២០១១-២០១២។

ទោះអ្នកណាជានាយករដ្ឋមន្ត្រីថ្មីក៏ដោយ មេដឹកនាំរូបនោះក៏នឹងប្រឈមមុខនឹងបញ្ហាដូចគ្នាក្នុងការទប់ទល់ជាមួយសភាដ៏បែកបាក់ដូចដែលលោក Barnier បានធ្វើ ជាពិសេសការអនុម័តថវិកាឆ្នាំក្រោយ ក្នុងពេលដ៏សំខាន់ដែលបារាំង ត្រូវការគ្រប់គ្រងហិរញ្ញវត្ថុសាធារណៈរបស់ខ្លួន៕