លោកប្រធានាធិបតីបារាំង Emmanuel Macron បានបញ្ជាក់ជាថ្មីនៅថ្ងៃព្រហស្បតិ៍ទី៥ ខែធ្នសប្ដាហ៍នេះថាលោកនឹងបន្តកាន់តំណែងរហូតដល់ចប់អាណត្តិរបស់លោកនៅខែឧសភា ឆ្នាំ២០២៧ ក្នុងសុន្ទរកថាទៅកាន់ប្រជាជាតិដែលបានធ្វើឡើងមួយថ្ងៃបន្ទាប់ពីសមាជិកសភាបានផ្តួលរំលំរដ្ឋាភិបាលរបស់លោក ដែលដឹកនាំដោយលោក មីហ្សែល បានីញ៉េ (Michel Barnier) ។ 

លោក Macron បាននិយាយក្នុងអំឡុងពេលសុន្ទរកថា ១០ នាទីថា អាណត្តិដែលអ្នកបានផ្តល់ឱ្យខ្ញុំគឺមានរយៈពេល ៥ ឆ្នាំ ហើយខ្ញុំនឹងអនុវត្តរហូតដល់ទីបញ្ចប់ ដោយបន្ថែមថាលោកនឹងតែងតាំងនាយករដ្ឋមន្ត្រីថ្មីនៅក្នុងពេលប៉ុន្មានថ្ងៃខាងមុខនេះ។   

លោក Macron បានស្ដីបន្ទោសស្ថានភាពបច្ចុប្បន្នលើកង្វះការទទួលខុសត្រូវរបស់សមាជិកសភាបក្សប្រឆាំង ហើយបាននិយាយថាក្រុមស្តាំនិងឆ្វេងនិយមជ្រុល បានបង្កើតជារណសិរ្សប្រឆាំងសាធារណរដ្ឋ។

លោកបាននិយាយថា រដ្ឋាភិបាលថ្មីនឹងអនុម័តច្បាប់ពិសេសមួយឡើងវិញនូវថវិកាឆ្នាំ២០២៤ សម្រាប់ឆ្នាំ ២០២៥ ហើយបន្ទាប់មកធ្វើសេចក្តីព្រាងថវិកាថ្មីនៅដើមឆ្នាំក្រោយ។ 

លោក Macron បានជួបសម្ព័ន្ធមិត្ត និងមេដឹកនាំសភាកាលពីថ្ងៃព្រហស្បតិ៍ ខណៈលោកបានស្វែងរកការតែងតាំងនាយករដ្ឋមន្ត្រីថ្មីយ៉ាងឆាប់រហ័សដើម្បីជំនួសលោក បានីញ៉េ ដែលបានលាលែងពីតំណែងជាផ្លូវការមួយថ្ងៃបន្ទាប់ពីសមាជិកសភាគណបក្សប្រឆាំងបានបោះឆ្នោតផ្តួលរំលំរដ្ឋាភិបាលរបស់លោក ដោយស្នើឲ្យលោក បានីញ៉េ និងរដ្ឋាភិបាលរបស់លោកធ្វើជារដ្ឋាភិបាលចាំផ្ទះរហូតរដ្ឋាភិបាលថ្មី ត្រូវបានត្រូវបានបង្កើតឡើង៕