ជំនួបរវាងក្រុមប្រឹក្សាអភិវឌ្ឍន៍កម្ពុជា និងសភាពាណិជ្ជកម្មនិងឧស្សាហកម្មនៃសាធារណរដ្ឋស៊ែប៊ី នឹង​ក្លាយទៅជាច្រកទ្វារថ្មី សម្រាប់ ការទាក់ទាញវិនិយោគទ្វេទិស ឈានឆ្ពោះ​សម្រេច​បាន​នូវ​វត្តមាន​របស់​សហគ្រាស មកពីប្រទេសក្នុងតំបន់ Balkans មកបណ្តាក់ ទុនវិនិយោគនៅ​កម្ពុជា​នា​ពេល​អនាគត។    

ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា ក្នុង​ជំនួប​ពិភា​ក្សា​ការងារ ជាមួយគណៈប្រតិភូ នៃសភាពាណិជ្ជកម្ម និងឧស្សាហកម្មនៃសាធារណរដ្ឋស៊ែប៊ី ដែល​ដឹក​នាំ​ដោយ ឯកឧត្តម តាន់ ប៊ុនប៉ា ឯកអគ្គរាជទូតវិសាមញ្ញ និងពេញ សមត្ថភាព​នៃ​ព្រះរាជា​ណា​ចក្រ​​កម្ពុជា ប្រចាំប្រទេសស៊ែប៊ី និងលោកស្រី Jovana Majstorovic ប្រធាន​មជ្ឈមណ្ឌល​ទទួល​បន្ទុក​កិច្ចការអាស៊ី, នៅថ្ងៃទី ៥ ធ្នូ ម្សិលមិញនេះ, ឯកឧត្តមបានជម្រាបជូនភាគីមិត្ត អំពី​សាវតារ​នៃ​ការ​រៀបចំតាក់តែងបទប្បញ្ញត្តិ និងគោល នយោបាយពាក់ព័ន្ធ នឹងការ​​វិនិយោគ​ដែល​រាជ​រដ្ឋាភិបាល​តែង​តែ ធ្វើការកែលម្អជាប្រចាំសំដៅផ្តល់កិច្ចសម្រួល, ការលើកទឹកចិត្ត និង ការ​ថែ​ទាំ​វិនិយោ​គ​ជូនវិនិយោគិនជាតិ និងអន្តរជាតិ ឱ្យកាន់តែមានភាពទាក់ទាញ និងអំណោយផលខ្ពស់។

បន្ថែមពីនេះ ឯកឧត្តមក៏បានបង្ហាញសុទិដ្ឋិនិយមថា ជំនួបរវាងក្រុមប្រឹក្សាអភិវឌ្ឍន៍កម្ពុជា និង​សភា​ពាណិជ្ជកម្ម និង ឧស្សាហកម្មនៃសាធារណរដ្ឋស៊ែប៊ី នឹងក្លាយទៅជាច្រកទ្វារថ្មី សម្រាប់​ពង្រឹង និង​ពង្រីកសកម្មភាពជំរុញ និងទាក់ទាញវិនិយោគទ្វេទិស ឈានឆ្ពោះ​សម្រេច​បាន​នូវ​វត្តមាន​របស់សហគ្រាស មកពីប្រទេសក្នុងតំបន់ Balkans មកបណ្តាក់ទុន​វិនិយោគ​នៅ​កម្ពុជា​នា​ពេល​អនាគត។    

នៅក្នុងជំនួបនេះដែរ, លោកស្រី Jovana Majstorovic បានសម្តែងនូវសេចក្តីរីករាយ សម្រាប់​បដិ​សណ្ឋារកិច្ចប្រកបដោយ ភាពកក់ក្តៅ របស់ក្រុមប្រឹក្សាអភិវឌ្ឍន៍កម្ពុជា ជូនចំ​ពោះ​គណៈ​ប្រតិភូ​ដែល​អញ្ជើញម​កពីប្រទេសស៊ែប៊ី។ ស្របគ្នានេះ លោកស្រី ក៏បានជម្រាបជូន អំពីការរៀបចំ និង​ការ​ប្រព្រឹត្តទៅរបស់ស្ថាប័នសភាពាណិជ្ជកម្ម និងឧស្សាហកម្ម និងបង្ហើបអំពីលទ្ធភាពក្នុងការរឹត ចំណង កិច្ចសហការជាមួយក្រុមប្រឹក្សាអភិវឌ្ឍន៍កម្ពុជា ឱ្យកាន់តែប្រសើរឡើងនាពេលខាងមុខ។ នៅ​ក្នុងឱកាសនេះ លោកស្រី ក៏បាន ស្នើភាគីកម្ពុជា ពិនិត្យលទ្ធភាពសហការរៀបចំជំនួបធុរកិច្ច ក្នុង​ឱកាសពិព័រណ៍ពិភពលោកអូសាកា ២០២៥ នៅប្រទេសជប៉ុន និង Expo Belgrade ២០២៧ នៅប្រទេសស៊ែប៊ី ក្នុងគោលដៅលើកកម្ពស់ការឈ្វេងយល់អំពីបច្ចុប្បន្នភាពថ្មី នៃ​សក្តា​នុពល និង បរិយាកាសវិនិយោគនៅកម្ពុជា ជូនចំពោះសហគមន៍ធុរកិច្ចក្នុងតំបន់ Balkans៕ អត្ថបទ៖ សុន រ៉ាឌី