អតីតនាយករដ្ឋមន្ត្រីប្រទេសប៉ាគីស្ថាន លោក Imran Khan ត្រូវបានចោទប្រកាន់ កាលពីថ្ងៃព្រហស្បតិ៍ ទី៥ ខែធ្នូ ពីបទញុះញង់ឲ្យមានការវាយប្រហារប្រឆាំងយោធា ជាករណីដែលផ្តើមចេញពីការប្រមូលផ្តុំគ្នាប្រឆាំងរដ្ឋាភិបាល ដឹកនាំដោយគណបក្សរបស់លោក កាលពីឆ្នាំមុន។

ការចោទប្រកាន់នេះ គឺជាករណីចុងក្រោយក្នុងចំណោមករណីរាប់សិបករណី ប្រឆាំងអតីតកីឡាករវាយកូនបាល់(Cricket) វ័យ៧២ឆ្នាំ ដែលបានក្លាយជាអ្នកនយោបាយ និងបានជាប់ពន្ធនាគារចាប់តាំងពីចុងឆ្នាំមុន។ បទចោលប្រកាន់ បានធ្វើឡើងប៉ុន្មានម៉ោង បន្ទាប់ពីតុលាការបានចេញដីកាចាប់ខ្លួនភរិយារបស់ លោក Khan ។

ប្រព័ន្ធផ្សព្វផ្សាយក្នុងស្រុក និងគណបក្សរបស់លោក បាននិយាយថា លោក Khan បានផ្តល់ចម្លើយពីភាពគ្មានទោស ខណៈចៅក្រមនៅក្នុងតុលាការប្រឆាំងភេរវកម្ម នៅទីក្រុង រ៉ាវ៉ាល់ពីនឌី(Rawalpindi) បានអានការចោទប្រកាន់លើរូបលោក និងមនុស្សរាប់សិបនាក់ផ្សេងទៀត រួមទាំងអតីតរដ្ឋមន្ត្រី មេដឹកនាំ និងអ្នកគាំទ្ររបស់លោក។ មន្ត្រីគណបក្សរបស់លោកបាននិយាយថានឹងតទល់ទៅនឹងបទចោទប្រកាន់នេះ។

អ្នកនាំពាក្យគណបក្ស Pakistan Tehreek-e-Insaf (PTI) របស់លោក Khan បាននិយាយថា «បទចោទប្រកាន់នេះបានធ្វើឡើងដោយគ្មានភស្តុតាង ឬការបង្ហាញភស្តុតាងណាមួយឡើយ។

លោក Khan បច្ចុប្បន្នកំពុងស្ថិតក្រោមការជម្រះក្តីលើបទចោទប្រកាន់អំពើពុករលួយ ទោះបីជាការកាត់ទោសទាំងអស់របស់លោក ត្រូវបានព្យួរ ឬលុបចោលក៏ដោយ។

អ្នកគាំទ្ររបស់លោក Khan រាប់ពាន់នាក់ បានវាយប្រហារ និងដុតបំផ្លាញអគារនិងការិយាល័យយោធាជាច្រើនកន្លែង រួមទាំងទីបញ្ជាការយោធានៅទីក្រុង Rawalpindi កាលពីថ្ងៃទី៩ ខែឧសភា ឆ្នាំ ២០២៣ ក្នុងការតវ៉ាប្រឆាំងការចាប់ខ្លួន លោក Khan ជុំវិញការចោទប្រកាន់ពីបទពុករលួយ។