នគរបាលទីក្រុងញូវយ៉ក សហរដ្ឋអាមេរិក កាលពីថ្ងៃព្រហស្បតិ៍ (០៥ ធ្នូ) បន្តតាមប្រម៉ាញ់ជនល្មើស ដោយចេញផ្សាយរូបថតថ្មីបង្ហាញពីមុខមាត់របស់បុរស ដែលសង្ស័យថាបាញ់សម្លាប់នាយកប្រតិបត្តិម្នាក់របស់ក្រុមហ៊ុន យូណាយធីត ហ៊ែលស៍ (UnitedHealth) ដ៏ធំគឺលោក ប្រាយអ៊ិន ថមសុន (Brian Thompson) នៅតំបន់ មែនហាត់ថាន (Manhattan) ដោយឃាតករនៅតែមិនទាន់ចាប់បាន ជិត ៣៦ម៉ោងបន្ទាប់ពីអាជ្ញាធរបើកប្រតិបត្តិការស្វែងទូទាំងទីក្រុងដើម្បីចាប់ខ្មាន់កាំភ្លើង។

លោក Thompson នាយកប្រតិបត្តិនៃអង្គភាពធានារ៉ាប់រងរបស់ក្រុមហ៊ុន UnitedHealth ត្រូវបានបាញ់ពីក្រោយកាលពីព្រឹកថ្ងៃពុធ នៅក្នុងអ្វីដែលនគរបាលពិពណ៌នាថាជាការវាយប្រហារកំណត់គោលដៅ ដោយខ្មាន់កាំភ្លើងពាក់ម៉ាស់។ ហេតុការណ៍នេះបានកើតឡើងមុនពេលសន្និសីទវិនិយោគិនប្រចាំឆ្នាំរបស់ក្រុមហ៊ុន។

នគរបាលមិនបានបញ្ជាក់ប្រាប់ហេតុផលក្រោយការបាញ់ប្រហារនោះទេ ប៉ុន្តែលោក Thompson ហាក់ដូចជាត្រូវបានគេកំណត់គោលដៅដោយចេតនា នេះបើយោងតាមអ្នកស៊ើបអង្កេត។ ប្រភពនគរបាលបានប្រាប់សារព័ត៌មាន ABC និង New York Post ថា៖ ពាក្យថា "បដិសេធ" "ការពារ" និង "ទម្លាក់ចោល" ត្រូវបានគេឆ្លាក់ចូលទៅក្នុងសំបកគ្រាប់កាំភ្លើង ដែលបានរកឃើញនៅកន្លែងកើតហេតុ។

ពាក្យទាំងនេះបានរំលឹកពីចំណងជើងសៀវភៅមួយក្បាលបោះពុម្ពក្នុងឆ្នាំ២០១០ ដែលរងការរិះគន់ពីឧស្សាហកម្មធានារ៉ាប់រង មានចំណងជើងថា "ពន្យាពេល បដិសេធ ការពារ៖ ហេតុអ្វីបានជាក្រុមហ៊ុនធានារ៉ាប់រងមិនបង់សំណង ហើយនិងប៉ុន្មានចំណុចដែលអ្នកអាចធ្វើបានបើជួបបញ្ហាទាំងនោះ"។ អ្នកនិពន្ធសៀវភៅ លោកសាស្រ្តាចារ្យ Jay Feinman មិនបានអត្ថាធិប្បាយអ្វីឡើយជុំវិញឧបទ្ទវហេតុនេះ៕