ទីភ្នាក់ងារសារព័ត៌មាន RIA បានដកស្រង់សម្តីមន្ត្រីជាន់ខ្ពស់រុស្ស៊ី ដែលបាននិយាយនៅថ្ងៃសុក្រនេះថា ការងារនឹងបន្តធ្វើ ពាក់ព័ន្ធនឹងប្រព័ន្ធទូទាត់របស់ក្រុមប្រទេស BRICS បើទោះបីជាការគំរាមកំហែងរបស់ប្រធានាធិបតីជាប់ឆ្នោត លោក Donald Trump របស់សហរដ្ឋអាមេរិក ក្នុងការដាក់ពន្ធនាំចូល ១០០ភាគរយលើប្រទេសដែលព្យាយាមធ្វើឲ្យប៉ះពាល់ប្រាក់ដុល្លារក៏ដោយ ។

គួររំលឹកថា លោក Trump កាលពីសប្តាហ៍មុន បានទាមទារឲ្យបណ្តាប្រទេសជាសមាជិករបស់ប្លុក BRICS ប្តេជ្ញាថា នឹងមិនបង្កើតរូបិយប័ណ្ណថ្មី ឬគាំទ្ររូបិយប័ណ្ណផ្សេងទៀត ដែលនឹងជំនួសប្រាក់ដុល្លារអាមេរិកជាដាច់ខាត ដោយនិយាយថា ពួកគេនឹងប្រឈមជាមួយការយកពន្ធ ១០០ភាគរយ។

សារព័ត៌មាន RIA បានដកស្រង់សម្តីអនុរដ្ឋមន្ត្រីការបរទេសរុស្ស៊ី លោក Alexander Pankin ដែលបាននិយាយថា ប្លុក BRICS តាមពិតកំពុងធ្វើការ ពាក់ព័ន្ធនឹងប្រព័ន្ធទូទាត់ ជាជាងប្រើប្រាស់រូបិយប័ណ្ណអន្តរជាតិថ្មី។ ដោយសំដៅលើការងារ ពាក់ព័ន្ធនឹងប្រព័ន្ធដែលបានគ្រោងទុកនោះ លោក Pankin បានប្រាប់យ៉ាងខ្លីថា៖ «ប្រាកដណាស់ វានឹងបន្តទៅមុខ»៕