ការប្រយុទ្ធគ្នា បានផ្ទុះឡើងនៅក្នុងទីក្រុង Jenin ភាគខាងជើងនៃតំបន់វេសបែង កាលពីថ្ងៃព្រហស្បតិ៍ រវាងក្រុមសកម្មប្រយុទ្ធ និងកងកម្លាំងសន្តិសុខប៉ាឡេស្ទីន បន្ទាប់ពីមានការលួចរថយន្តដែលជាកម្មសិទ្ធិរបស់អាជ្ញាធរប៉ាឡេស្ទីន។ នេះបើយោងតាមអ្នកសារព័ត៌មាន AFP នៅក្នុងទីក្រុងនេះ។

យោងតាមអ្នកសារព័ត៌មាននោះ បានឲ្យដឹងថា ការបាញ់គ្នាយ៉ាងខ្លាំងក្លា បានចាប់ផ្តើមនៅម៉ោង៩:៣០ យប់ (១៩:៣០ម៉ោងសកល) ហើយបានកើតឡើងបន្ទាប់ពីការដាក់ពង្រាយសមាជិកនៃកងកម្លាំងសន្តិសុខ នៅជុំវិញជំរំជនភៀសខ្លួន Jenin ដែលនៅជាប់នឹងទីក្រុងនេះ និងជាបន្ទាយរឹងមាំសម្រាប់ក្រុមប្រដាប់អាវុធ នៅក្នុងទឹកដីនេះដែរ។ 

សាក្សីបានរាយការណ៍ថា កងកម្លាំងសន្តិសុខប៉ាឡេស្ទីន បានដាក់របាំងបិទផ្លូវលើផ្លូវនានាចេញពីជំរំ Jenin។

ភាពតានតឹងបានកើនឡើងយ៉ាងខ្លាំងក្នុងក្រុង Jenin នៅពេលព្រឹកថ្ងៃ បន្ទាប់ពីក្រុមប្រដាប់អាវុធមួយក្រុមបានរឹបអូសរថយន្តពីរគ្រឿងដែលជាកម្មសិទ្ធិរបស់ PA និងបានដង្ហែតាមដងផ្លូវដោយគ្រវីទង់សាសនា    ឥស្លាមជីហាដ។ នៅក្នុងសេចក្តីថ្លែងការណ៍មួយ ឧត្តមសេនីយ៍ Anwar Rajab អ្នកនាំពាក្យរបស់កងកម្លាំងសន្តិសុខ បាននិយាយថា៖«ក្រុមជនក្រៅច្បាប់ បានបើកការបាញ់ប្រហារទៅលើទីស្នាក់ការកណ្តាលនៃសេវាសន្តិសុខ» និងបានលួចរថយន្តចំនួនពីរគ្រឿង។ លោកបាននិយាយថា កម្លាំងសន្តិសុខនឹង «យករថយន្តមកវិញ ហើយចាប់អ្នកណាដែលប្រព្រឹត្តអំពើនេះ ឲ្យទទួលខុសត្រូវ»។