នៅថ្ងៃសុក្រនេះ ក្រសួងការពារជាតិកូរ៉េខាងត្បូង បានសុំទោសសម្រាប់ក្តីកង្វល់បណ្តាលមកពីការប្រកាសច្បាប់អាជ្ញាសឹករបស់លោកប្រធានាធិបតី Yoon Suk Yeol កាលពីដើមសប្តាហ៍នេះ ហើយពួកគេនិយាយថា សេចក្តីរាយការណ៍មុននេះពីការប្រកាសច្បាប់អាជ្ញាសឹកមួយទៀត គឺមិនពិតនោះទេ ។

 រដ្ឋមន្រ្តីការពារជាតិស្តីទីកូរ៉េខាងត្បូងលោក Kim Seon-ho បាននិយាយនៅក្នុងសន្និសីទសារព័ត៌មានថា លោកនឹងមិនស្តាប់បង្គាប់ការបញ្ជាណាមួយឲ្យអនុវត្តការប្រកាសច្បាប់អាជ្ញាសឹកមួយទៀតនោះទេ ។

 លោក Seon-ho និយាយថា ព្រឹកមិញនេះ អំណះអំណាងលើកឡើងដោយមនុស្សមួយចំនួន ពាក់ព័ន្ធនឹងស្ថានភាពច្បាប់អាជ្ញាសឹកទី ២ គឺមិនពិតទាល់តែសោះ ។ 

 លោកថា បើទោះបីជាមានការទាមទារណាមួយពាក់ព័ន្ធនឹងការប្រកាសច្បាប់អាជ្ញាសឹកម្តងទៀតក្តី ក្រសួងការពារជាតិ និងនាយអគ្គសេនាធិការកងទ័ពចម្រុះ នឹងមិនទទួលយកវាជាដាច់ខាត ។

 គួរឲ្យដឹងថា កាលពីយប់ថ្ងៃអង្គារកន្លងទៅ លោក Yoonបានធ្វើកូរ៉េខាងត្បូង និងគណបក្សកាន់អំណាចរបស់លោក គឺគណបក្សអំណាចប្រជាជនមានការភ្ញាក់ផ្អើលយ៉ាងខ្លាំង ពេលដែលលោកប្រកាសដាក់ច្បាប់អាជ្ញាសឹក ដើម្បីកម្ចាត់កម្លាំងប្រឆាំងរដ្ឋ និងយកឈ្នះក្រុមប្រឆាំងនយោបាយរារាំង ។

 ទោះបីជាយ៉ាងណាក៏ដោយ រយៈពេល ៦ម៉ោងក្រោយមក លោក Yoonបានដកចេញវិញ ពេលដែលរដ្ឋសភាគ្រប់គ្រងដោយក្រុមប្រឆាំង បានបោះឆ្នោតជំទាស់ ។

 នៅក្នុងដំណើរការនោះ យោធាបានអនុវត្តតាមបទបញ្ជាច្បាប់អាជ្ញាសឹកដឹកនាំដោយលោកឧត្តមសេនីយ៍កងទ័ព Park An-su ដែលប្រកាសក្រឹត្យហាមប្រាមសកម្មភាពនយោបាយទាំងអស់ ខណៈចល័តកងកម្លាំងប្រតិបត្តិការពិសេស ចូលទៅឡោមព័ទ្ធបរិវេនរដ្ឋសភា ។

 គណបក្សប្រឆាំងប្រជាធិបតេយ្យ បានកំណត់បោះឆ្នោតចោទប្រកាន់នៅល្ងាចថ្ងៃសៅរ៍ស្អែកនេះ ហើយនគរបាលជាតិ បានបើកការស៊ើបអង្កេតករណីរបស់លោក Yoon ជុំវិញអំណះអំណាងបះបោរលើកឡើងដោយគណបក្សប្រឆាំង និងក្រុមសកម្មជន ៕