សហភាពអឺរ៉ុប (EU) បានឈានដល់កិច្ចព្រមព្រៀងពាណិជ្ជកម្មដ៏សំខាន់មួយ កាលពីថ្ងៃសុក្រ (ទី៦ ខែធ្នូ) ជាមួយប្រទេសចំនួន ៤ នៅតំបន់អាមេរិកខាងត្បូង ដោយបានបញ្ចប់ទាំងស្រុងនូវការចរចារអូសបន្លាយពេលយ៉ាងយូរ ដែលបានបង្ហាញពីភាពបន្ទាន់ថ្មី ខណៈដែលប្រធានាធិបតីជាប់ឆ្នោត លោក Donald Trump បានគំរាមយកពន្ធលើប្រទេសដែលមានសេដ្ឋកិច្ចធំជាងគេមួយចំនួនរបស់ពិភពលោក។

កិច្ចព្រមព្រៀង រវាង EU និងសមាជិករបស់ Mercosur ជាប្លុកដែលរួមមានប្រទេសអាហ្សង់ទីន ប្រេស៊ីល ប៉ារ៉ាហ្គាយ និងអ៊ុយរូហ្គាយ នឹងបង្កើតបានជាតំបន់ពាណិជ្ជកម្មធំបំផុតមួយ ក្នុងពិភពលោក ហើយនឹងក្លាយជាកិច្ចព្រមព្រៀងពាណិជ្ជកម្មដ៏ធំបំផុតមិនធ្លាប់មានរបស់ EU។

ដោយបណ្ដាមេដឹកនាំអ៊ឺរ៉ុបរៀបចំត្រៀមសម្រាប់លទ្ធភាពដែលការវិលត្រលប់របស់លោក Trump ទៅកាន់កាន់តំណែងនៅសេតវិមានវិញ នឹងនាំទៅរកសេដ្ឋកិច្ចពិភពលោកបែកបាក់ជាងមុន កិច្ចព្រមព្រៀងនេះ គឺជាជ័យជម្នះដ៏សំខាន់ សម្រាប់អ្នកគាំទ្រពាណិជ្ជកម្មសេរី ដោយផ្សារភ្ជាប់ទីផ្សារជាមួយមនុស្សជាង ៧០០លាននាក់។

ប៉ុន្តែយ៉ាងណាក្ដី វាក៏អាចបង្កឲ្យមានការមិនសប្បាយចិត្តផងដែរ នៅក្នុងរង្វង់សមាជិកប្លុកអ៊ឺរ៉ុប ដោយប្រទេសបារាំង ដែលជាអ្នករិះគន់ដ៏ធំបំផុត ចំពោះការស្រុះស្រួលគ្នានេះ ប្រឆាំងនឹងការបង្កើតកិច្ចព្រមព្រៀងនេះ ដោយសារព្រួយបារម្ភអំពីលទ្ធភាពនៃការនាំចូលផលិតផលកសិកម្មរម្លៃថោក នៅអឺរ៉ុប ដែលអាចប៉ះពាល់ដល់កសិកររបស់ខ្លួន។ ប្រសិនបើត្រូវបានផ្តល់សច្ចាប័នដោយរដ្ឋជាសមាជិក EU និងសភាអឺរ៉ុប កិច្ចព្រមព្រៀងនេះនឹងមិនយកពន្ធលើផលិតផលជាច្រើន ដែលរួមមានសាច់ រថយន្ត ស្រា និងសូកូឡា។

ដោយការជាប់ឆ្នោតឡើងវិញរបស់លោក Trump អឺរ៉ុបកំពុងប្រឈមនឹងការគំរាមកំហែងពីការយកពន្ធខ្ពស់លើការនាំចេញទៅកាន់សហរដ្ឋអាមេរិក ដែលជាដៃគូពាណិជ្ជកម្មដ៏ធំបំផុតរបស់ខ្លួន និងការកើនឡើងនូវការប្រកួតប្រជែងពីប្រទេសចិន។ គួរបញ្ជាក់ថា លោក Trump បានលើកឡើងថា លោកនឹងដាក់ពន្ធពី ១០ ទៅ ២០ភាគរយលើផលិតផល នៅជុំវិញពិភពលោក ហើយថា នឹងដំឡើងពន្ធដល់ ៦០ភាគរយ ឬច្រើនជាងនេះ ចំពោះទំនិញរបស់ចិន។

ប្រធានគណៈកម្មការអឺរ៉ុប លោកស្រី Ursula von der Leyen ដែលជាផ្នែកប្រតិបត្តិរបស់ប្លុកនេះ បាននិយាយកាលពីថ្ងៃទី៦ ខែធ្នូថា កិច្ចព្រមព្រៀងនយោបាយនេះ គឺជាព្រឹត្តិការណ៍ដ៏សំខាន់មួយ ទាំងសម្រាប់អឺរ៉ុប និងអាមេរិកខាងត្បូង៕