ការបោះឆ្នោតប្រធានាធិបតីជុំទី២ របស់ប្រទេសរ៉ូម៉ានី រវាងបេក្ខជនស្តាំនិយមជ្រុល លោក Calin Georgescu និងអ្នកគាំទ្រសហភាពអឺរ៉ុប (EU) លោកស្រី Elena Lasconi ឥឡូវនេះ ត្រូវ​បាន​លុប​ចោល បន្ទាប់ពីតុលាការធម្មនុញ្ញ (CCR) បានចាត់ទុកជា​មោឃភាពនូ​វ​លទ្ធផល​នៃ​ការ​បោះឆ្នោត​ជុំទី១ ហើយបានប្រកាសថា ការបោះឆ្នោតថ្មីទាំងស្រុង នឹងត្រូវធ្វើឡើងជំនួសវិញ។

ការសម្រេចជាប្រវត្តិសាស្ត្រ និងមិនធ្លាប់មានពីមុនមកនេះ កើត​មាន​ឡើង​ស្រប​ពេល​ដែល​ការ​បោះឆ្នោត​បាន​ចាប់ផ្តើមនៅក្នុងចំណោមជនអន្តោប្រវេសន៍។ កាលពីថ្ងៃសុក្រ (ទី៦ ខែធ្នូ) តុលាការ​បានឲ្យដឹងនៅក្នុងសេចក្តីថ្លែងការណ៍មួយថា៖ «ដំណើរការបោះឆ្នោត ដើម្បី​ជ្រើសរើស​ប្រធានា​ធិបតីរ៉ូម៉ានី នឹងត្រូវបានចាប់ផ្ដើមឡើងវិញទាំងស្រុង ដោយតម្រូវ​ឲ្យ​រដ្ឋាភិបាល​កំណត់​កាល​បរិច្ឆេ​ទ​ថ្មី សម្រាប់ការបោះឆ្នោតប្រធានាធិបតីរូម៉ានីនេះ ក៏ដូចជាកម្មវិធីប្រតិទិនថ្មី ដើម្បីអ​នុវត្ត​​វិធានការចាំបាច់នានា»។

ជាមួយ​គ្នានេះ តុលាការបានបញ្ជាក់ថា ការសម្រេចលុបចោលលទ្ធផលជុំទី១ គឺដោយ​សារ​តែ​បញ្ហា​នីតិវិធី និងការបង្ហាញនូវរបាយការណ៍សម្ងាត់ពីសេវាចារកម្មរ៉ូម៉ានី ដែលបង្ហាញ​ពី​ការ​ចូល​រួម​របស់​រុស្ស៊ី ដើម្បីមានឥទ្ធិពលលើអ្នកបោះឆ្នោត តាមរយៈយុទ្ធនាការ​ឃោសនា​ប្រឆាំង​នឹង​លោក​ខាង​លិច ដែលគាំទ្រលោក Georgescu។

គួរបញ្ជាក់ថា របាយការណ៍ស៊ើបការណ៍សម្ងាត់ បានបង្ហាញពីដំណើរការខុសច្បាប់ជាច្រើន នៅ​ក្នុង​ការ​ផ្តល់ហិរញ្ញប្បទានដល់យុទ្ធនាការរបស់លោក Georgescu។ នៅមុននេះ បន្ទាប់​ពីលោក Georgescu បានផ្ដល់ភាពភ្ញាក់ផ្អើលដល់មជ្ឈដ្ឋាននយោបាយ ដោយការឈរនៅលំដាប់ទី១ តុលាការ​បានវាយតម្លៃលើសំណើសុំឲ្យចាត់ទុកជាមោឃភាព ចំពោះលទ្ធផលនៃការបោះឆ្នោតនេះ ប៉ុន្តែ​បាន​សម្រេចឲ្យបន្តដំណើរការទៅមុខ។

ការ​សម្រេចកាលពីថ្ងៃសុក្រ បានធ្វើឲ្យប្រទេស​នេះ​ស្ថិត​ក្នុង​ស្ថានភាព​នយោបាយ​មិន​ធ្លាប់​មាន​ពី​មុន ដោយផលវិបាកមិនអាចទាយទុកមុនបានឡើយ៕