បើតាមមន្ត្រីស៊ីរីម្នាក់ ដែលត្រូវបានផ្ដល់ដំណឹងពីការធ្វើដំណើរ បានឲ្យដឹងថា ប្រធានាធិបតីស៊ីរី លោក Bashar al-Assad (បាសា អាល់-អាសាដ) បានភៀសខ្លួនចេញពីទីក្រុង Damascus (ដាម៉ាស) ហើយ នៅថ្ងៃទី៨ ខែធ្នូ ខណៈដែលក្រុមឧទ្ទាមចូលដល់រដ្ឋធានី ហើយបញ្ជាការកងទ័ពស៊ីរី បានជូនដំណឹងដល់មន្ត្រីថា ការគ្រប់គ្រងរយៈពេល ២៤ឆ្នាំរបស់លោក Assad ត្រូវបានបញ្ចប់បន្ទាប់ពីការវាយលុកយ៉ាងលឿនរហ័សរបស់ពួកឧទ្ទាម។

តែយ៉ាងក្ដី មេដឹកនាំក្រុមឧទ្ទាមស៊ីរី លោក Ahmed al-Sharaa (អាមេដ អាល់-សារ៉ា) នៅថ្ងៃអាទិត្យនេះ បាននិយាយថា ត្រូវបានហាមឃាត់មិនឲ្យចូលទៅជិតស្ថាប័នសាធារណៈ ដែលលោកបាននិយាយថា នឹងនៅតែស្ថិតក្រោមការគ្រប់គ្រងរបស់ «អតីតនាយករដ្ឋមន្ត្រី» រហូតដល់វាត្រូវបានប្រគល់ជាផ្លូវការ។

នាយករដ្ឋមន្ត្រីស៊ីរី លោក Mohammad Ghazi al-Jalali (មហាមេដ ហ្គាហ្ស៊ី អាល់-ចាឡាលី) បាននិយាយថា លោកនៅតែស្ថិតក្នុងគេហដ្ឋានរបស់លោក ហើយត្រៀមខ្លួនជាស្រេច ដើម្បីគាំទ្រដល់ការបន្តអភិបាលកិច្ច។ ពួកឧទ្ទាមស៊ីរីបាននិយាយថា ក្រុងដាម៉ាស «ឥឡូវនេះបានរួចផុតពីដៃរបស់លោក អាសាដ» ហើយ។

មន្ត្រីយោធាជាន់ខ្ពស់ ២រូប បានប្រាប់សារព័ត៌មាន Reuters ថា មុននេះ លោក អាសាដ បានហោះចេញពីទីក្រុងដាម៉ាសទៅកាន់ទិសដៅដែលមិនត្រូវបានដឹង នៅថ្ងៃទី៨ ខែធ្នូ ខណៈដែលក្រុមឧទ្ទាម បាននិយាយថា ពួកគេបានចូលដល់រដ្ឋធានី ដោយគ្មានសញ្ញាពីការដាក់ពង្រាយកងទ័ព។

សាក្សីបានប្រាប់ថា មនុស្សរាប់ពាន់នាក់ នៅក្នុងរថយន្ត និងដើរដោយថ្មើរជើង បានមកជួបជុំគ្នានៅទីលានដ៏សំខាន់ ក្នុងទីក្រុងដាម៉ាស ដោយគ្រវី និងស្រែកថា «សេរីភាព»។ ចំណែកពួកឧទ្ទាម បាននិយាយថា «យើងសូមអបអរជាមួយប្រជាជនស៊ីរីនូវដំណឹងនៃការដោះលែងអ្នកទោសរបស់យើង និងប្រកាសពីការបញ្ចប់នូវយុគសម័យនៃភាពអយុត្តិធម៌ នៅក្នុងពន្ធនាគារ Sednaya»៕