នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអាទិត្យ ទី៨ ខែធ្នូថា លោកបានចេញបញ្ជាឱ្យយោធាអ៊ីស្រាអែល «ដណ្តើមយក» តំបន់ទ្រនាប់គ្មានយោធានៅតាមព្រំដែនជាមួយប្រទេសស៊ីរី បន្ទាប់ពីការផ្តួលរំលំលោក Bashar al-Assad ក្នុងទីក្រុងដាម៉ាស។

នាយករដ្ឋមន្ត្រីអ៊ីស្រាអែល បាននិយាយថា «កិច្ចព្រមព្រៀងដកខ្លួន» ដែលមានអាយុកាល៥០ឆ្នាំរវាងប្រទេសទាំងពីរបានដួលរលំ ហើយ «កងកម្លាំងស៊ីរី បានបោះបង់ចោលទីតាំងរបស់ពួកគេ»។

ជាលទ្ធផល លោកបាននិយាយថា «ខ្ញុំបានបញ្ជាឱ្យកងកម្លាំងការពារអ៊ីស្រាអែល(IDF) វាយដណ្តើមយកតំបន់ទ្រនាប់ និងទីតាំងទីបញ្ជាការ នៅក្បែរនោះ»។

ការប្រកាស ដែលលោក Netanyahu បានធ្វើឡើង ខណៈលោកទៅពិនិត្យមើលតំបន់ខ្ពង់រាប Golan Heights កាន់កាប់ដោយអ៊ីស្រាអែល ស្ថិតនៅលើតំបន់ទ្រនាប់ បានកើតឡើងបន្ទាប់ពីយោធាបាននិយាយថា ខ្លួនបានដាក់ពង្រាយកម្លាំងទៅកាន់តំបន់នោះ។

អ៊ីស្រាអែលបាននិយាយរួចមកហើយកាលពីថ្ងៃមុន ខណៈក្រុមឧទ្ទាមដឹកនាំដោយអ៊ីស្លាមនិយម បានរុលទៅមុខយ៉ាងលឿននៅទូទាំងប្រទេសស៊ីរី ថា ទាហានរបស់ខ្លួន បានចូលទៅក្នុងតំបន់ទ្រនាប់ដែលការពារដោយអង្គការសហប្រជាជាតិ ដើម្បីជួយដល់កងរក្សាសន្តិភាពក្នុងការវាយរុញច្រានការវាយប្រហារ។

កាលពីថ្ងៃអាទិត្យ កងទ័ពបានប្រកាសពីការដាក់ពង្រាយកងទ័ពនៅទីនោះ ដោយលើកឡើងពី «ការចូលរបស់ជនប្រដាប់អាវុធ ទៅក្នុងតំបន់ទ្រនាប់» ។

សេចក្តីថ្លែងការណ៍យោធាបាននិយាយថា បន្ទាប់ពីព្រឹត្តិការណ៍ថ្មីៗជាច្រើននៅក្នុងប្រទេសស៊ីរី កងកម្លាំងការពារអ៊ីស្រាអែល បានដាក់ពង្រាយកងកម្លាំងនៅក្នុងតំបន់ទ្រនាប់ និងនៅកន្លែងផ្សេងៗទៀតដែលចាំបាច់សម្រាប់ការការពាររបស់ខ្លួន ដើម្បីធានាបានសុវត្ថិភាពសហគមន៍តំបន់ខ្ពង់រាប Golan Heights និងពលរដ្ឋអ៊ីស្រាអែល។