អាជ្ញាធរការពារជាតិរបស់កោះតៃវ៉ាន់ បាននិយាយកាលពីថ្ងៃអាទិត្យ (០៨ ធ្នូ) ថា ប្រទេសចិន បានបង្កើនចំនួននាវាចម្បាំងរបស់ខ្លួនជិតទ្វេដងដែលប្រតិបត្តិការជុំវិញកោះក្នុងរយៈពេល ២៤ម៉ោងមុននោះ ខណៈប្រភពសន្តិសុខរំពឹងថានឹងមានហ្គេមសង្គ្រាមជុំថ្មី។

ប្រទេសចិន ដែលចាត់ទុកកោះតៃវ៉ាន់ថាជាទឹកដីរបស់ខ្លួន មានការខឹងសម្បារចំពោះដំណើររបស់មេដឹកនាំកោះ លោក Lai Ching-te ទៅកាន់កោះហាវ៉ៃ និងកោះ ហ្គាំ របស់សហរដ្ឋអាមេរិក ជាផ្នែកនៃដំណើរទស្សនកិច្ចនៅប៉ាស៊ីហ្វិក ហើយលោក Lai បានត្រឡប់មកពីដំណើរពេញមួយសប្តាហ៍របស់ខ្លួនកាលពីនៅយប់ថ្ងៃសុក្រ។

នៅក្នុងរបាយការណ៍ប្រចាំថ្ងៃរបស់ខ្លួនពីសកម្មភាពយោធារបស់ចិន អាជ្ញាធរការពារជាតិតៃវ៉ាន់បាននិយាយថា មាននាវាចម្បាំងចិនចំនួន ១៤គ្រឿងដែលកំពុងប្រតិបត្តិការនៅក្បែរកោះ ពោលគឺកើនឡើងពីចំនួន ៨គ្រឿងដែលខ្លួនរាយការណ៍កាលពីថ្ងៃមុននោះ។ អាជ្ញាធរបន្តថា ខ្លួនក៏បានពិនិត្យឃើញបាឡុងចិនចំនួន ៤គ្រឿងហោះពីលើច្រកសមុទ្រតៃវ៉ាន់ ដែលមួយក្នុងចំណោមនោះបានហោះពីលើកោះ។

ប្រភពសន្តិសុខបាននិយាយថា អាកាសធាតុទំនងជាកត្តាមួយក្នុងការសម្រេចចិត្តរបស់ចិន លើហ្គេមសង្គ្រាមណាមួយ ហើយអាកាសធាតុនៅច្រកសមុទ្រមានសភាពមិនសូវល្អទេកាលពីចុងសប្តាហ៍នេះ។ នៅក្នុងការអត្ថាធិប្បាយយ៉ាងខឹងសម្បារនៅលើគណនី WeChat របស់ខ្លួនកាលពីថ្ងៃអាទិត្យ ក្រសួងសន្តិសុខរដ្ឋរបស់ចិន បាននិយាយថា កិច្ចខិតខំប្រឹងប្រែងរបស់លោក Lai ដើម្បី "ប្រើអាវុធស្វែងរកឯករាជ្យ" និងភាពកក់ក្ដៅជាមួយអាមេរិក នឹងត្រូវ "បរាជ័យ"៕