ភ្នំពេញ៖ តំណាងស្ថានទូត អង្គការ សមាគម សហជីព និងកម្មករនិយោជិតចំនួនប្រមាណជាង ២,០០០​នាក់ នៅថ្ងៃទី៨ ខែធ្នូនេះ បានចូលរួមប្រារព្ធទិវាសិទ្ធិមនុស្សអន្តរជាតិ ខួបលើកទី៧៦ ក្រោម​ប្រធានបទ «សិទ្ធិសេរីភាពសហជីព សមាគម និងប្រព័ន្ធគាំពារសង្គម» នៅទីលាន​ប្រជាធិប​តេយ្យ ខណ្ឌឫស្សីកែវ រាជធានីភ្នំពេញ ក្រោមអធិបតីភាព ឯកឧត្តម ហេង សួរ រដ្ឋមន្រ្តី​ក្រសួង​ការងារ និងបណ្តុះបណ្តាលវិជ្ជាជីវៈ។

ក្នុងឱកាសនោះ ឯកឧត្តម ហេង សួរ មានប្រសាសន៍ថា ការប្រារព្ធទិវាសិទ្ធិមនុស្ស ១០ ធ្នូ ប្រារ​ព្ធ​ឡើង​ដើម្បី​រំលឹកដល់ថ្ងៃមហាសន្និបាតអង្គការ​សហប្រជាជាតិដែលបានអនុម័ត​នូវ​សេចក្តី​ប្រកាស​ជា​សកល​ស្តីពីសិទ្ធិមនុស្សនៅក្នុងឆ្នាំ១៩៤៨ ដែលបានបញ្ជាក់យ៉ាងច្បាស់ថា មនុស្សគ្រប់​រូប​មាន​សិទ្ធិ​ទទួល​បាននូវសិទ្ធិសេរីភាព ដោយគ្មានការបែងចែក និងរើសអើងអំពីជាតិសាសន៍ ពណ៌​សម្បុរ ភេទ អាយុ ភាសា សាសនា មតិយោបល់ ប្រភពដើមនៃជាតិ ឬសង្គម ស្ថានភាពសេដ្ឋកិច្ច កំណើត ពិការភាព ឬស្ថានភាពអ្វីផ្សេងនោះឡើយ។

ឯកឧត្តម​រដ្ឋមន្ត្រី បានរំលឹកថា សម្រាប់កម្ពុជា ក្នុងសម័យរបបប្រល័យពូជសាសន៍ខ្មែរក្រហម ប្រជា​ពលរដ្ឋមិនមានសិទ្ធិសេរីភាពអ្វីទាំងអស់ សូម្បីសិទ្ធិរស់រានមានជីវិត សិទ្ធិទទួលទានអាហារ សិទ្ធិពិនិត្យព្យាបាលជំងឺ សិទ្ធិជំនឿសាសនា សិទ្ធិសិក្សាអប់រំ សិទ្ធិជ្រើសរើសតំណាង សិទ្ធិ​បញ្ចេញ​មតិ សិទ្ធិរៀបអាពាហ៍ពិពាហ៍ និងសិទ្ធិប្រកបការងារ ជាដើម។ ជាក់ស្តែង ទើប​តែ​ក្រោយ​ពេល​ដែល​កម្ពុជា​បានបញ្ចប់សង្គ្រាមក្នុងប្រទេសទាំងស្រុង ទើបអាចមានឱកាសក្នុង​ការ​អភិវឌ្ឍ​ប្រទេស​ជាតិ​ជា​បន្ត​បន្ទាប់ រួមទាំងការគិតគូរពីប្រព័ន្ធគាំពារសង្គមផងដែរ។ ជាពិសេសរហូតមកដល់អាណត្តិទី៧ នៃរាជរដ្ឋាភិបាល ប្រព័ន្ធគាំពា​រ​សង្គម​ត្រូវ​បាន​ពង្រីក​យ៉ាង​ទូលំ​ទូលាយ​ដែលគ្របដណ្តប់ចាប់តាំងពីអ្នកសេដ្ឋកិច្ចក្នុងប្រព័ន្ធ រហូតដល់អ្នក​ប្រកបរបរ​សេដ្ឋកិ​ច្ច​ក្រៅ​ប្រព័ន្ធ​ទៀតផង។  

ពាក់ព័ន្ធទៅនឹងសិទ្ធិសេរីភាពសហជីព សមាគម ឯកឧត្តមរដ្ឋមន្ត្រី ហេង សួរ បានបញ្ជាក់ថា រាជ​រដ្ឋាភិបាល បាននិងកំពុងបន្តលើកកម្ពស់សិទ្ធិសេរីភាពអង្គការវិជ្ជាជីវៈ ស្របតាមច្បាប់ស្តីពីការងារ ច្បាប់​ស្តីពីសហជីព និងលិខិតបទដ្ឋានការងារអន្តរជាតិនានា។ គិតត្រឹមខែវិច្ឆិកា ឆ្នាំ២០២៤ ក្រសួង​ការងារ និងបណ្តុះបណ្តាលវិជ្ជាជីវៈ បានចុះបញ្ជិកាអង្គការវិជ្ជាជីវៈសរុបចំនួនជាង ៦,៤០០។ ដោយឡែកចំនួនសមាគម និងអង្គការក្រៅរដ្ឋាភិបាលដែលចុះបញ្ជីនៅក្រសួងមហាផ្ទៃ គិត​ត្រឹមខែកុម្ភៈ ឆ្នាំ២០២៤ មានចំនួនជាង៦,៤០០។ សម្រាប់វិស័យសារព័ត៌មាន បច្ចុប្បន្ន​នេះ​មាន​ស្ថាប័នព័ត៌មានទាំងបុរាណ និងទំនើប បានចុះបញ្ជីនៅក្រសួងព័ត៌មានមានជាង ២ពាន់​អង្គភាព រួមមាន៖គេហទំព័រ ទូរទស្សន៍អនឡាញ, កាសែត, ទស្សនាវដ្តី, ទីភ្នាក់ងារ​ព័ត៌មាន​បរទេស និងការិយាល័យតំណាង ស្ថានីយវិទ្យុ FM និងវិទ្យុ AM ជាដើម។ ទាំងនេះបង្ហាញថា កម្ពុជាមានលំហសិទ្ធិសេរីភាពយ៉ាងពេញលេញ។

ឯកឧត្តម ហេង សួរ ក៏បានអំពាវនាវដល់សហជីពទាំងអស់នៅកម្ពុជា ត្រូវគោរព​ឆន្ទៈ​គ្នា​ទៅ​វិញ​ទៅ​មក ដោយយកការពិភាក្សាជាមួយគ្នាត្រង់ទៅត្រង់មក ដើម្បីដោះស្រាយ​បញ្ហា​រួមគ្នា​ប្រកប​ដោយ​ប្រសិទ្ធភាព មានទំនាក់ទំនងល្អក្នុងវិជ្ជាជីវៈ និងសុខដុមនីយកម្មរួមគ្នា៕ អត្ថបទ ឈិត បូរ៉ាវី