នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ការផ្លាស់ប្តូរអំណាចនៅក្នុងប្រទេសស៊ីរី គឺជាលទ្ធផលនៃការវាយប្រហាររបស់អ៊ីស្រាអែល ទៅលើអ៊ីរ៉ង់ និងកងកម្លាំងហេសបូឡា នៅក្នុងប្រទេសលីបង់។

លោកបានថ្លែងនៅពេលចុះទៅពិនិត្យស្ថានការណ៍នៅតំបន់អ៊ីស្រាអែលជាប់ព្រំដែនស៊ីរីថា៖«ថ្ងៃនេះគឺជាថ្ងៃបង្កើតប្រវត្តិសាស្ត្រសម្រាប់មជ្ឈិមបូព៌ា។ របបរបស់លោក [បាសា] អាល់អាសាដ (Bashar al-Assad) ដែលមានទំនាក់ទំនង ដ៏សំខាន់ជាមួយអ័ក្សនៃអំពើអាក្រក់របស់អ៊ីរ៉ង់ បានដួលរលំ។ នេះគឺជាលទ្ធផលផ្ទាល់នៃការវាយប្រហារដែលយើងបានធ្វើទៅលើអ៊ីរ៉ង់ និងក្រុមហេសបូឡា ដែលជាអ្នកគាំទ្រដ៏សំខាន់របស់របបលោក អាសាដ។ ការដួលរលំនេះ បានបង្កឲ្យមានប្រតិកម្មជាបន្តបន្ទាប់នៅទូទាំងមជ្ឈិមបូព៌ា ក្នុងចំណោមអ្នកដែលចង់រំដោះខ្លួនចេញពីរបបគាបសង្កត់ និងឃោរឃៅនេះ។

លោកនាយករដ្ឋមន្ត្រី បានបញ្ជាក់ជាថ្មីថា អ៊ីស្រាអែលត្រៀមខ្លួនជាស្រេច ក្នុងការអភិវឌ្ឍន៍ទំនាក់ទំនងអ្នកជិតខាងល្អជាមួយប្រជាជនស៊ីរីទាំងនោះ ដែលចង់មានទំនាក់ទំនងមិត្តភាពជាមួយអ៊ីស្រាអែល ហើយនឹងមិនអត់ធ្មត់ចំពោះកម្លាំងអរិភាព នៅតាមតំបន់ព្រំដែនឡើយ។ លោកក៏បាននិយាយដែរថា ការផ្លាស់ប្តូរអំណាច នៅទីក្រុងដាម៉ាស «បើកឱកាសដ៏សំខាន់ថ្មី» សម្រាប់ប្រទេសរបស់លោក។ ទោះយ៉ាងណាក៏ដោយ លោកបានលើកឡើងថា ការផ្លាស់ប្តូរអំណាចនេះ អាចនឹងមានហានិភ័យថ្មី។