នៅថ្ងៃចន្ទ (ទី៩ ខែធ្នូ) នេះ ប្រជាជនស៊ីរីភ្ញាក់ពីដំណេកមកអមដោយក្តីសង្ឃឹម ប៉ុន្តែប្រឈមនឹងអនាគតមិនច្បាស់លាស់ បន្ទាប់ពីពួកឧទ្ទាមបានដណ្តើមយករដ្ឋធានី Damascus (ដាម៉ាស) ហើយប្រធានាធិបតី Bashar al-Assad (បាសា អាល់-អាសាដ) បានភៀសខ្លួនទៅកាន់ប្រទេសរុស្ស៊ី ដោយនេះជាព្រឹត្តិការណ៍ ដែលបានបញ្ចប់សង្គ្រាមស៊ីវិលរយៈពេល ១៣ឆ្នាំ និងការគ្រប់គ្រងយ៉ាងឃោរឃៅរបស់គ្រួសារលោក ក្នុងរយៈពេល ៥០ឆ្នាំ។

គួរបញ្ជាក់ថា ការវាយរុលទៅមុខយ៉ាងលឿនរហ័សដូចផ្លេកបន្ទោររបស់សម្ព័ន្ធជីវពលដឹកនាំដោយក្រុម Hayat al-Tahrir al-Sham (HTS) ដែលជាអតីតមែកធាងរបស់ក្រុមអាល់កៃដា បានបង្កើតបានជាចំណុចរបត់ដ៏ធំបំផុតមួយ សម្រាប់តំបន់មជ្ឈិមបូព៌ា ក្នុងរយៈពេលជាច្រើនជំនាន់មកនេះ។ ការដួលរលំរបស់របបលោក Assad បានបំផ្លាញទីតាំងមួយ ដែលអ៊ីរ៉ង់ និងរុស្ស៊ី បានប្រើប្រាស់ឥទ្ធិពលគ្របលើទូទាំងពិភពអារ៉ាប់។

ទីក្រុងមូស្គូបានផ្តល់សិទ្ធិជ្រកកោនដល់លោក Assad និងក្រុមគ្រួសាររបស់លោក។ នេះបើយោងតាមសេចក្ដីរាយការណ៍ពីប្រព័ន្ធផ្សព្វផ្សាយរុស្ស៊ី និងលោក Mikhail Ulyanov ឯកអគ្គរដ្ឋទូតរុស្ស៊ីប្រចាំអង្គការអន្តរជាតិ នៅទីក្រុងវីយែន ប្រទេសអូទ្រីស កាលពីថ្ងៃអាទិត្យ (ទី៨ ខែធ្នូ)។

រដ្ឋាភិបាលសកលលោកបានស្វាគមន៍ការបញ្ចប់របបគ្រប់គ្រងនៃរដ្ឋាភិបាលស្វយ័តរបស់លោក Assad ខណៈដែលពួកគេប្រឹងប្រឹងវាយតម្លៃពីមុខមាត់ថ្មីរបស់តំបន់មជ្ឈិមបូព៌ា។ ប្រធានាធិបតីអាមេរិកលោក Joe Biden បាននិយាយថា ប្រទេសស៊ីរីស្ថិតក្នុងដំណាក់កាលនៃហានិភ័យ និងភាពមិនប្រាកដប្រជា ហើយវាជាលើកទី១ ក្នុងរយៈពេលជាច្រើនឆ្នាំដែលទាំងរុស្ស៊ី អ៊ីរ៉ង់ និងអង្គការសកម្មប្រយុទ្ធហេសបូឡា មិនមានតួនាទីជះឥទ្ធិពល នៅទីនោះ។

យ៉ាងណាក្ដី ក្រុម HTS នៅតែត្រូវបានចាត់ទុកថា ជាក្រុមភេរវករដោយសហរដ្ឋអាមេរិក ទួរគី និងអង្គការសហប្រជាជាតិ ទោះបីជាក្រុមនេះបានប្រើពេលជាច្រើនឆ្នាំ ក្នុងការព្យាយាមបង្ហាញពីរូបភាពទន់ភ្លន់របស់ខ្លួន ដើម្បីធានាដល់រដ្ឋាភិបាលអន្តរជាតិ និងក្រុមជនជាតិភាគតិច នៅក្នុងប្រទេសស៊ីរីក៏ដោយ៕