រដ្ឋមន្ត្រីការបរទេស លោក Gideon Saar នៅថ្ងៃចន្ទ (ទី៩ ខែធ្នូ) នេះ បាននិយាយថា អ៊ីស្រាអែលកាន់តែមានសុទិដ្ឋិនិយម ជុំវិញកិច្ចព្រមព្រៀងចំណាប់ថ្នូរ នៅតំបន់ហ្កាហ្សា ចំពេលមានរបាយការណ៍ថា ក្រុមហាម៉ាស បានស្នើសុំបញ្ជីឈ្មោះចំណាប់ថ្នូរទាំងអស់ដែលនៅតែត្រូវបានឃុំឃាំងដោយក្រុមសកម្មប្រយុទ្ធ នៅដែនដីប៉ាឡេស្ទីន។

លោក Saar បានប្រាប់ថា ការចរចាដោយប្រយោល កំពុងដំណើរការ ពាក់ព័ន្ធនឹងការនាំត្រលប់មកវិញនូវចំណាប់ថ្នូរប្រមាណជា ១០០នាក់ ហើយថា បើទោះបីជាវានៅតែលឿនពេកមិនអាចធានាពីភាពប្រាកដប្រជាបាននោះ ក៏ការរំពឹងមានកាន់តែខ្ពស់ជាងមុនដែរ។

អមដោយការបញ្ជាក់ឡើងវិញពីជំហររបស់អ៊ីស្រាអែល ដែលថា ចំណាប់ថ្នូរដែលនៅតែជាប់ឃុំខ្លួន នៅតំបន់ហ្កាហ្សា ត្រូវតែត្រលប់មកវិញ មុនពេលអ៊ីស្រាអែលយល់ព្រមបញ្ចប់ការប្រយុទ្ធនោះ លោក Saar បានប្រាប់សន្និសីទសារព័តមាននៅទីក្រុងហ្សេរុយសាឡឹមថា៖ «យើងអាចមានសុទិដ្ឋិនិយមជាងមុន ប៉ុន្តែយើងមិនទាន់មានកិច្ចព្រមព្រៀងនៅឡើយទេ។ ខ្ញុំសង្ឃឹមថា យើងនឹងមានកិច្ចព្រមព្រៀង»។ លោកបានបញ្ជាក់បន្ថែមថា៖ «នឹងមិនមានបទឈប់បាញ់ជាដាច់ខាត នៅហ្កាហ្សា ប្រសិនបើគ្មានកិច្ចព្រមព្រៀងដោះលែងចំណាប់ថ្នូរ»។

មន្ត្រីប៉ាឡេស្ទីនដែលបានដឹងអំពីកិច្ចខិតខំប្រឹងប្រែងសម្របសម្រួល បាននិយាយថា ក្រុមហាម៉ាសបានស្នើឲ្យក្រុមបក្សពួកផ្សេងទៀត នៅក្នុងតំបន់ហ្កាហ្សា ចាប់ផ្តើមរាយឈ្មោះចំណាប់ថ្នូរជនជាតិអ៊ីស្រាអែល និងបរទេស នៅក្នុងមន្ទីរឃុំឃាំងរបស់ពួកគេ មិនថា ស្លាប់ ឬនៅរស់នោះទេ។

មន្ត្រីរូបនេះមិនបានផ្តល់ព័ត៌មានលម្អិតបន្ថែមអំពីកិច្ចខិតខំប្រឹងប្រែងសម្របសម្រួលនេះទេ ប៉ុន្តែបាននិយាយថា អ្នកសម្រុះសម្រួលដែលគាំទ្រដោយសហរដ្ឋអាមេរិក បានបង្កើនទំនាក់ទំនងជាមួយអ៊ីស្រាអែល និងក្រុមហាម៉ាស។ មន្ត្រីក្រុមហាម៉ាស បានបដិសេធមិនផ្ដល់ការអត្ថាធិប្បាយអ្វីភ្លាមៗឡើយ ពាក់ព័ន្ធនឹងការលើកឡើងនេះ៕