ប្រធានាធិបតី លោក Ferdinand Marcos Jr នៅថ្ងៃអង្គារ (ទី១០ ខែធ្នូ) នេះថា ប្រទេសហ្វីលីពីននឹងបន្តបេសកកម្មផ្គត់ផ្គង់ឡើងវិញនូវសម្ភារៈប្រៀប្រាស់ នៅសមុទ្រចិនខាងត្បូង ដោយមិនចាំបាច់ដាក់ពង្រាយកងទ័ពជើងទឹក បើទោះបីជាមានឧប្បត្តិហេតុថ្មីៗនេះជាមួយនាវាចិន នៅក្នុងដែនទឹកមានជម្លោះក៏ដោយ។

អមដោយការបន្ថែមថា ហ្វីលីពីននឹងបន្តគាំទ្រសហគមន៍នេសាទរបស់ប្រទេសនេះ លោក Marcos បានប្រាប់អ្នកសារព័ត៌មានថា៖ «យើងនឹងមិនដែលជាផ្នែកមួយនៃការបង្កើនភាពតានតឹង នៅក្នុងសមុទ្រហ្វីលីពីនភាគខាងលិចនោះឡើយ»។

ការលើកឡើងរបស់លោកនោះ គឺសំដៅទៅផ្នែកនៃសមុទ្រចិនខាងត្បូងដែលខ្លួនអះអាងថា ជាសមុទ្រហ្វីលីពីនភាគខាងលិច។

បើយោងតាមមន្ត្រីហ្វីលីពីន បានឲ្យដឹងថា កាលពីថ្ងៃទី៤ ខែធ្នូ នាវាល្បាតឆ្មាំឆ្នេររបស់ប្រទេសចិន បានប្រើកាណុងបាញ់ទឹក ហើយបានរុញច្រានទូកការិយាល័យជលផលទីក្រុងម៉ានីល ដែលដឹកជញ្ជូនគ្រឿងផ្គត់ផ្គង់សម្ភារៈប្រើប្រាស់ទៅឲ្យអ្នកនេសាទហ្វីលីពីន ដែលកំពុងប្រតិបត្តិការ នៅជុំវិញតំបន់ថ្មប៉ប្រះទឹក Scarborough Shoal ដែលជាកន្លែងនេសាទដ៏សំខាន់មួយ។

យ៉ាងណាក្ដី លោក Marcos បានបញ្ជាក់ថា ប្រទេសហ្វីលីពីននឹងមិនដាក់ពង្រាយនាវាចម្បាំងរបស់ខ្លួនទៅកាន់តំបន់នោះឡើយ ដើម្បីការពារកុំឲ្យមានការបង្កហេតុ និងការកើនឡើងនូវភាពតានតឹង។

ពាក់ព័ន្ធនឹងហេតុការណ៍ថ្ងៃទី៤ ខែធ្នូនោះ ទីក្រុងម៉ានីលបានដាក់កំណត់ទូតតវ៉ា ប្រឆាំងនឹងប្រទេសចិនដែលទាមទារស្ទើរតែទាំងអស់នៃតំបន់ នៅសមុទ្រចិនខាងត្បូង៕