នាយកដ្ឋានស៊ើបអង្កេតពិសេស (DSI) កាលពីថ្ងៃចន្ទ (ទី៩ ខែធ្នូ) បានប្រកាសថា គ្រូបង្រៀនម្នាក់ នៅសាលាក្រុងបាងកក ត្រូវបានតុលាការខេត្ត Phitsanulok កាត់ទោសឲ្យជាប់ពន្ធនាគា ១១១ឆ្នាំ និង ២១៦ខែ ក្នុងសំណុំរឿងពាក់ព័ន្ធនឹងការលួងលោម និងរំលោភបំពានផ្លូវភេទលើក្មេងប្រុសមិនទាន់គ្រប់អាយុ។

គ្រូបង្រៀនរូបនេះ ក៏ត្រូវបានបង្គាប់ឲ្យបង់ប្រាក់ចំនួន ១,៥លានបាត (ជាង ៤០.០០០ដុល្លារ) ជាសំណងដល់ក្មេងប្រុស និង ៦៥០.០០០បាតដល់ម្តាយរបស់ក្មេង សម្រាប់បទឧក្រិដ្ឋដែលលោកបានប្រព្រឹត្ត នៅពេលកំពុងបង្រៀននៅសាលាមួយ ក្នុងខេត្ត Phitsanulok ។

បុរសវ័យ ៣២ឆ្នាំ គឺលោក Tee ដែលឈ្មោះចុងក្រោយ ត្រូវបានដកចេញតាមដីការបង្គាប់ ត្រូវបានចាប់ខ្លួននៅថ្ងៃទី២៤ ខែមិថុនា ដែលជាផ្នែកមួយនៃការស៊ើបអង្កេតរបស់ DSI លើភ្នាក់ងារបង្ហាញម៉ូដ នៅខេត្ត Pathum Thani ដែលត្រូវបានសង្ស័យពីបទលួងលោម និងបំពានផ្លូវភេទលើកុមារ។

ម្ចាស់ទីភ្នាក់ងារបង្ហាញម៉ូដ Nene Modeling ឈ្មោះ Danudet Saengkaew អាយុ ២៨ឆ្នាំ បានសារភាពថា បានប្រព្រឹត្តបទល្មើសព្រហ្មទណ្ឌនេះ កាលដើមឆ្នាំនេះ បន្ទាប់ពីនគរបាល បានរកឃើញពីការរក្សាទុករូបភាពកុមារដែលត្រូវបានរំលោភបំពានផ្លូវភេទចំនួនជាង ៥០០.០០០រូប។

លោកត្រូវបានរកឃើញថា មានទោសជាង ៦០បទល្មើស ហើយត្រូវបានកាត់ទោសឲ្យជាប់ពន្ធនាគារ ១២១ឆ្នាំ និង ២២៦ខែ កាលពីថ្ងៃទី១១ ខែកុម្ភៈ។ ហើយលោក Danudet ក៏ត្រូវបានបង្គាប់ឲ្យបង់ប្រាក់ចំនួន ២,១លានបាត ជាសំណងដល់ជនរងគ្រោះ ៨នាក់ ដែល DSI កំណត់អត្តសញ្ញាណពីរូបថត។

ការស៊ើបអង្កេតរបស់ DSI បានរកឃើញថា លោក Danudet និងលោក Tee បានធ្វើការជាមួយគ្នាលួងលោមក្មេងៗ។ DSI បានឲ្យដឹងថា ភ័ស្តុតាងបង្ហាញថា អ្នកទាំង២ អាចរំលោភផ្លូវភេទលើជនរងគ្រោះជាង ១.០០០នាក់។ នាយកដ្ឋាននេះកំពុងធ្វើការលើការកំណត់អត្តសញ្ញាណជនរងគ្រោះផ្សេងទៀត នៅក្នុងរូបថត ដើម្បីធានាឲ្យមានយុត្តិធម៌ សម្រាប់អ្នកដែលត្រូវបានរំលោភបំពាន៕